Llwybrau beicio di-draffig yng Nghymru i’r teulu i gyd

Heb draffig, mae hi’n haws. Mae’r llwybrau di-draffig hyn yn ddiogel ac yn rhwydd i’w beicio, ac yn tywys eich teulu drwy rai o ardaloedd brafiaf Cymru. Dewch â’ch beics eich hun neu llogwch feics ar ôl cyrraedd. Bydd hi’n antur heb ei hail i’r teulu i gyd.

Mae gan Gymru gannoedd o filltiroedd o lwybrau beicio di-draffig a thraffig ysgafn, a hynny diolch i’r Rhwydwaith Beicio Cenedlaethol. Mae nifer o’r llwybrau hyn hefyd yn cysylltu ag ardaloedd gwyliau, parciau gwledig ac atyniadau hanesyddol, sy’n gyfle i gyfuno’ch reid ddi-draffig â rhai o olygfeydd gorau’r wlad. Does dim angen eich beic eich hun arnoch chi chwaith – mae digonedd o lefydd sy’n llogi beics ar gael. Y cyfan fydd ei angen arnoch fydd awr neu ddwy rydd. Mae’n ffordd rad iawn o roi profiad bythgofiadwy i’r teulu.

Bydd y mynyddoedd uchel wastad uwch eich pen, ond dydy hynny ddim yn golygu bod yn rhaid i chi feicio i’r copaon. Mae’r llwybrau beicio hyn yn y gogledd yn wastad ac yn rhwydd, ac felly’n ddelfrydol i’r teulu

Mae Llwybr Mawddach yn llwybr beicio heb ei ail i’r teulu. Mae’r golygfeydd yn odidog wrth i’r llwybr ddirwyn o dref farchnad Dolgellau i dref glan môr Abermaw, a hynny ar hyd glannau bendigedig Aber Mawddach.

Beth i’w ddisgwyl: Llwybr gwastad, rhwydd ar hyd hen reilffordd, bron yn gyfan gwbl ddi-draffig (ar wahân i ddarnau byr iawn ar y dechrau ac yn y trefi). Mae’r aber hwn ymhlith yr harddaf yn y wlad, lle gwelwch chi bontydd pren enwog, olion yr hen ddiwydiant adeiladu llongau, gwarchodfa natur Cors Arthog yr RSPB, a’r mynyddoedd hollbresennol ar y gorwel.

Lluniaeth: Mae digonedd o gaffis, tafarndai a llefydd hufen iâ yn Nolgellau ac Abermaw, tra bo tafarn George III yn Llynpenmaen, sy’n dyddio yn ôl i’r ail ganrif ar bymtheg, yn lle campus am hoe ar y ffordd.

Hyd: 19 milltir yno ac yn ôl. Neilltuwch ddwy i dair awr i gael taith hamddenol braf.

Llogi beics: Dolgellau Cycles amdani, sy’n gallu cynnig beics addas i’r teulu i gyd, yn ogystal â threlars.

A hwnnw’n mynd o Langefni i Falltraeth, bydd modd i’r teulu cyfan feicio’n rhwydd ar Lôn Las Cefni i lawr at y môr, gyda’r opsiwn o fynd ar antur bellach yn y naill ben. Dyma lwybr beicio gorau Ynys Môn i ddechreuwyr.

Beth i’w ddisgwyl: Mae mwyafrif y llwybr hynod wastad hwn yn cyd-redeg â Chors Ddyga ar hyd glannau afon Cefni – cadwch lygad am ddyfrgwn! Mae’n mynd heibio i warchodfa’r RSPB, ac ar hyd y Cob a godwyd i adennill tir ffermio o’r forfa heli. Mae modd reidio ymhellach wedyn yn y ddau ben. Yn y top, anelwch drwy warchodfa natur goediog Nant y Pandy gyda’i lwybr estyllod a’i gerfluniau, a dringo am gronfa ddŵr Llyn Cefni. I lawr ger y môr, dilynwch y llwybrau oddi ar y ffordd drwy Goedwig Niwbwrch lle cewch gip, efallai, ar wiwerod coch ymysg coed pinwydd Corsica. O fan hyn, cerddwch draw i draeth ac ynys Llanddwyn.

Hyd: 12 milltir bob ffordd. Dwy neu dair awr, gydag amser i stopio.

Lluniaeth: Fe gewch chi bopeth yn nhref sirol Llangefni, tra bo llefydd braf hefyd ym mhentrefi Malltraeth a Niwbwrch.

Llogi beics: Yn Llangefni, ewch i weld y criwiau cyfeillgar yn Anglesey Bikes neu CycleWales, neu os am feic trydan, Anglesey Electric Bike Hire amdani.

Mae llwybr beicio Lôn Eifion yn un hynod o boblogaidd yn y gogledd, a hwnnw’n mynd o Gaernarfon tua’r de ar hyd rhodfa werdd lydan. Mae’n llwybr tarmac di-draffig o’r naill ben i’r llall.

Beth i’w ddisgwyl: Gan ddechrau yng nghysgod hynod Castell Caernarfon, mae’r llwybr beicio’n cydredeg â Rheilffordd Eryri am blwc cyn gwahanu yn Llanwnda. Llwybr sy’n codi’n raddol bach yr holl ffordd ydy hwn cyn y cewch chi wibio i lawr allt i bentref Bryncir. Bydd y copaon enwog yn gwmni i chi ar hyd y daith – yn enwedig yr Wyddfa, yr Eifl a Chrib Nantlle – tra gallwch chi bicio i sawl pentref cyfagos neu fynd am dro sydyn i Barc Gwledig Glynllifon.

Hyd: 12.5 milltir bob ffordd, felly tua tair awr i gyd.

Lluniaeth: Mae digonedd o lefydd yng Nghaernarfon, ac opsiynau hefyd ym Mhenygroes a’r pentrefi eraill ar y daith. Mae yna gaffi hefyd yng Ngwaith Llechi Inigo Jones yn y Groeslon.

Llogi beics: Ewch i Beics Antur yng Nghaernarfon.

Fry ar Fynydd Hiraethog, mae Canolfan Ymwelwyr Llyn Brenig yn lle tawel braf i wneud chwaraeon dŵr, i fynd am dro ... ac i gael antur deuluol ar gefn beic, wrth gwrs. Mae saith o lwybrau beicio i’r teulu i ddewis o’u plith; rydyn ni wedi setlo ar lwybr hyfryd o amgylch Llyn Alwen gerllaw.

Beth i’w ddisgwyl: Gan ddechrau ym maes parcio Llyn Alwen, mae’r llwybr hwn, sy’n addas i’r teulu i gyd, yn arwain drwy goedwig a gweundir cyn dilyn glannau’r dŵr, a hynny ar lwybrau ag wyneb arnyn nhw a llwybrau coedwigaeth. Sylwch y bydd beicwyr yn mynd i gyfeiriad gwrthglocwedd, tra bydd cerddwyr yn mynd glocwedd. Mae bryn go fawr i’w ddringo hanner ffordd ar hyd y llwybr. Mae’r golygfeydd yma’n newid yn gyson dros y gronfa ddŵr a draw am gopaon Eryri. Mae byrddau gwybodaeth ar ochr y llwybr yn eich cyflwyno i’r bywyd gwyllt, y diwylliant a chwedlau.

Hyd: Saith milltir, a llai na dwyawr.

Lluniaeth: Ewch yn ôl i lawr i Gaffi Brenig yn Llyn Brenig am damaid bach i’w fwyta, ac efallai i gael cip ar ddyfrgwn yn ystod yr haf.

Llogi beics: Y ganolfan ymwelwyr amdani i logi beics – mae dewis i bawb o bob oed.

Mae’r canolbarth yn denu beicwyr ffordd a beicwyr mynydd rif y gwlith, ond mae yma hefyd lwybrau di-draffig sy’n addas iawn i deuluoedd.

Mae hen reilffyrdd yn creu llwybrau beicio penigamp, a dyna’n union gewch chi ar Lwybr Ystwyth, sy’n dilyn hen linell y Great Western Railway a arferai gysylltu Aberystwyth a Thregaron.

Beth i’w ddisgwyl: Mae’r llwybr 21 milltir o hyd yn cyd-redeg â’r afon drwy Gwm Ystwyth cyn dilyn afon Teifi i’r de am Dregaron, a hynny gan mwyaf ar lwybr yr hen reilffordd. Bydd angen diwrnod cyfan i wneud y daith yno ac yn ôl, ond fe allech chi hefyd ddewis rhannau penodol sy’n addas i’ch teulu chi. Mae’r rhan gyntaf o Aberystwyth i Lanilar, sy’n 6.5 milltir o hyd, yn ddewis da. Neu beth am ddechrau yn Llanilar ac anelu am y de ar ddarn 4 milltir rhwydd ar hyd glannau’r afon? Yn y rhan isaf, mae darn braf tu hwnt oddi ar y ffordd sy’n dilyn ymylon Gwarchodfa Natur Cors Caron.

Hyd: 21 milltir i gyd – bob ffordd. Felly dyna i chi ddiwrnod cyfan ar gefn beic. Ond mae modd beicio’r rhannau byrrach, haws hefyd mewn awr neu ddwy.

Lluniaeth: Mae pob math o ddewis yn y rhan uchaf rhwng Aberystwyth a Llanilar – ond prynwch rywbeth i’w fwyta yn Nhregaron os byddwch chi’n dilyn y llwybr i’r gogledd.

Llogi beics: Mae Afan Bike Hire yn Aberystwyth yn cynnig popeth o feics trelar i blant bach i dandemau.

Mae cronfeydd dŵr Cwm Elan yn dyst i ddoniau rhyfeddol peirianwyr sifil oes Fictoria, a’r cyfan mewn tirwedd sy’n cael ei gadw’n ddilychwin i sicrhau purdeb y dŵr. A pha ffordd well o grwydro’r ardal hon nag ar lwybrau beics teuluol? Mae naw llwybr i ddewis o’u plith.

Beth i’w ddisgwyl: Mae Llwybr Elan yn gadael cyrion tref Rhaeadr Gwy ar hyd llwybr hen reilffordd, gan basio’r ganolfan ymwelwyr a dringo heibio i gronfeydd y Caban Coch a’r Garreg Ddu, lle mae’r argaeau a’r tyrau dŵr yn werth eu gweld. Mae’r llwybr yn dod i ben ger cronfa ddŵr Penygarreg. Mae’n rhaid dringo’r holl ffordd i ben draw’r rhan olaf yma, ond bydd golygfeydd godidog yr ucheldir yn wobr i chi. Lawr rhiw fydd hi wedyn bob cam o’r ffordd adref.

Hyd: Taith 18 milltir i gyd. Neilltuwch dair awr go dda i fwynhau.

Lluniaeth: Mae caffi da yn y ganolfan ymwelwyr sydd mewn lleoliad strategol cyfleus dros ben, ac mae toiledau ym mhen draw’r llwybr. Mae Rhaeadr yn dref hyfryd, gyda digonedd o lefydd i gael hoe.

Llogi beics: Mae’r hyb beicio yn y ganolfan ymwelwyr yn cynnig gwasanaeth llogi llawn, a hefyd yn gallu golchi beics ar eich rhan.

Mae ffyrdd bach tawel y gorllewin yn llefydd gwych i feicio’n ddiogel, ond mae gan y fro hefyd lwybrau oddi ar y ffordd sy’n addas i blant ifanc.

Dyma daith feicio i’r teulu sy’n dechrau ar y tywod yn Nhraeth Aberafan ac yn gorffen, gwta saith milltir wedyn, yn ucheldiroedd trwchus Coedwig Afan.

Beth i’w ddisgwyl: Mae llwybr Cwm Afan yn eich tywys ar ddringfa raddol, hamddenol o lefel y môr, wrth i’r tarmac di-draffig gefnu ar brysurdeb diwydiannol Port Talbot a chyrraedd llwybr hardd drwy goetir ar lan yr afon. Pen y daith fydd canolfan ymwelwyr Parc Coedwig Afan – neu efallai mai dim ond dechrau antur arall fydd hyn! Mae yma lwybrau beicio mynydd sy’n addas i’r teulu, a fan hyn hefyd y mae Amgueddfa Glowyr De Cymru. Mae’n werth dweud bod y llwybr beicio yn parhau i ben uchaf y cwm, lle mae’n ymuno â rhwydwaith o lwybrau sy’n cysylltu holl gymoedd y de.

Hyd: Taith 13 milltir i gyd. Dwy awr yno ac yn ôl, ond fe allwch chi ddisgwyl treulio ychydig o amser yn crwydro parc y goedwig.

Lluniaeth: Mae popeth y byddwch chi’i angen yng nghanolfan ymwelwyr Parc Coedwig Afan, gyda digonedd o opsiynau eraill yn ôl ar yr arfordir.

Llogi beics: Mae’r Afan Valley Bike Shed yn arbenigo mewn beics mynydd i ymdopi â’r llwybrau lleol drwy’r goedwig.

Mae Llwybr Arfordir y Mileniwm yn ymestyn am 13 milltir ar hyd glan y môr yn Sir Gâr. Llwybr sy’n glynu at y tywod ydy hwn, a ffefryn ymhlith teuluoedd ar gefn beics.

Beth i’w ddisgwyl: Os mai dyma’ch tro cyntaf chi, hanner ffordd ar hyd y llwybr yn Noc y Gogledd ydy’r man cychwyn gorau. Penderfynwch wedyn ai troi eich trwynau am y dwyrain wnewch chi, heibio i Gwrs Golff Machynys (a ddyluniwyd gan Jack Nicklaus) a’r fflamingos sy’n byw yng Nghanolfan Gwlyptir Llanelli, neu anelu am y gorllewin tuag at harbwr Porth Tywyn ac yn eich blaenau am Barc Gwledig Pen-bre lle mae’r atyniadau’n niferus (traeth, llethr sgïo, golff gwyllt, llwybrau natur a mwy). Mae’r llwybr yn wastad ac yn rhwydd y naill ffordd neu’r llall, gyda golygfeydd gwych dros y gwlâu cocos am benrhyn Gŵyr. I deuluoedd sydd â phlant ifanc iawn, mae modd mentro ar y llwybr mewn pedair rhan fer unigol.

Hyd: Neilltuwch hanner diwrnod os byddwch chi’n beicio’r 13 milltir cyfan yno ac yn ôl, ond mae’n ddigon rhwydd dewis a dethol llwybrau byrrach.

Lluniaeth: Mae caffis a chyfleusterau i’w cael bob ryw ddwy filltir, felly fydd hyn ddim yn broblem.

Llogi beics: Parc Gwledig Pen-bre.

Yn sgil dad-ddiwydiannu cymoedd y de, cafodd beicwyr fantais annisgwyl: daeth hen lwybrau rheilffyrdd a llwybrau halio ar ochr camlesi yn rhwydwaith o lwybrau beicio i’r teulu, a hynny wrth i fyd natur hawlio’r meysydd glo yn ôl.

Dyma daith wych i deuluoedd a beicwyr amhrofiadol, wrth i’r llwybr di-draffig eich tywys o ganol Caerdydd yr holl ffordd at dyrau tylwyth teg Castell Coch.

Beth i’w ddisgwyl: Mae Taith Taf yn ymestyn am 55 milltir rhwng Caerdydd ac Aberhonddu, ond mae’r rhan chwe milltir hon yn ffordd dda i deuluoedd grwydro gwyrddni ein prifddinas ar gefn beic, a chael cyfle i weld castell hynod ar yr un pryd. Os byddwch chi’n llogi beics yn y parc, mae’r llwybr yn un tarmac rhwydd wedyn ar lan afon Taf. Mae darn byr (ond tawel) ar y ffordd drwy bentref Tongwynlais cyn i chi gyrraedd Castell Coch, a dringfa fer, serth at y castell ei hun. Gan hynny, efallai y byddai’r daith hon yn fwy addas i blant hŷn. Os ydy’r plant yn iau, mae pedlo o amgylch Parc Bute yn ffordd hyfryd o dreulio awr neu ddwy. Mae llefydd diogel i barcio beics y tu allan i Gastell Caerdydd a Stryd y Castell.

Hyd: Ni fydd y daith, sy’n 12 milltir i gyd, yn cymryd mwy na ryw awr a hanner – ond rhowch o leiaf awr arall i chi’ch hun i edmygu’r castell.

Lluniaeth: Mae sawl caffi ym Mharc Bute neu ar ei gyrion, gan gynnwys Caffi’r Tŷ Haf yn y parc a Chaffi’r Castell yn y castell ei hun (does dim angen prynu tocyn i fynd i mewn). Mae dwy ffynnon ddŵr ym Mharc Bute hefyd.

Llogi beics: Mae gan Pedal Power ganolfannau llogi yng Nghaeau Pontcanna a Bae Caerdydd, ac maen nhw’n gallu cynnig beics hygyrch. Os byddwch chi’n llogi eich beics o’r bae, ychwanegwch dair milltir bob ffordd at eich taith.

Llwybr byr, di-draffig yn bennaf, ydy Llwybr Peregrine sy’n eich tywys dros y ffin i Loegr, gan ddilyn afon Gwy ar hyd un o’i rhannau hyfrytaf. Teithio rhyngwladol, felly, ond heb yr ôl-troed carbon.

Beth i’w ddisgwyl: Gan ddechrau yn nhref hardd, hanesyddol Trefynwy, mae’r llwybr yn dilyn glannau afon Gwy cyn mynd drwy Geunant Gwy. Ryw ddwy draean o’r ffordd, fe groeswch chi’r ffin i Loegr a chyrraedd Symonds Yat. Cadwch olwg am hebogiaid tramor uwch eich pen – dyma un o’r llefydd gorau ym Mhrydain i weld yr adar ysglyfaethus ysblennydd hyn. Trowch yn ôl wedyn am Drefynwy – tref hyfryd iawn.

Hyd: Taith 11 milltir i gyd. Dwy awr o reidio linc-di-lonc.

Lluniaeth: Mae digon o ddewis yn Nhrefynwy, a hefyd yn Yat Symond (Symonds Yat) – ond sylwch nad oes dim byd rhwng y ddau le.

Llogi beics: Mae gan Launch Bikes yn Nhrefynwy bopeth sydd ei angen arnoch chi.