O glogwyni gwyntog a bywyd gwyllt Sir Benfro, i lannau prysur Bae Abertawe, draw i gefn gwlad heddychlon Sir Gâr, anelwch am y gorllewin i ddadebru, i ymlacio, ac i greu atgofion oes.
Gwyliau teuluol anturus yn y gorllewin
Mae’r golygfeydd rhyfeddol, y traethau ysblennydd a’r llond gwlad o bethau i’w gwneud ym mhob tywydd yn golygu bod teuluoedd wedi heidio ar eu gwyliau i’r gorllewin ers cenedlaethau lawer.
Mae gan Sir Gâr bob math o bethau i’r holl deulu eu gwneud. Mae Castell Carreg Cennen yn lle heb ei ail am bicnic. Mae’r adfeilion dirgel, y twneli tanddaearol, a’r golygfeydd godidog yn gwneud i fan hyn ymddangos fel rhywle allan o stori i lygaid ifanc. Ewch ar daith gyffrous drwy fwynglawdd danddaearol, neu roi cynnig ar olchi aur mewn padell ym Mwyngloddfeydd Aur Dolaucothi. Am ychydig oriau mwy hamddenol, mae gan Ardd Fotaneg Genedlaethol Cymru lefydd agored rif y gwlith sy’n berffaith am bicnic a chyfle i chwarae.
Beth am fwynhau gwyliau bach yn Sir Benfro, lle mae rhai o atyniadau teuluol gorau’r Deyrnas Unedig? Bydd pawb wrth eu boddau ar saffari cerdded yn y Manor Wildlife Park. Mae anturiaethau lu hefyd yn eich aros yn Heatherton World of Activities, gan gynnwys gwibgertio, golff gwyllt a saethyddiaeth.
Ar wyliau ym Mae Abertawe, fe gewch chi bopeth y byddwch chi’n ei ddisgwyl wrth gael hoe mewn dinas, yn ogystal â milltiroedd dirifedi o hwyl glan môr. Mae taith i’r Mwmbwls a’r pier yn sicr o fod yn hwyl – lle llawn arcedau, hufen iâ, a llefydd i bysgota am grancod. Ewch i LC Abertawe i fwynhau’r llithrenni dŵr a’r peiriannau creu tonnau, neu i Sw Trofannol Plantasia lle mae’r goedwig law dan do yn ddelfrydol ar ddiwrnodau gwlyb neu i chwythu stêm am brynhawn. Yn Abertawe hefyd fe ddewch chi ar draws sawl amgueddfa ardderchog, gan gynnwys Amgueddfa Genedlaethol y Glannau.
Ymhlith llefydd aros gwych i deuluoedd mae:
- Pentref Gwyliau Bluestone – sydd â gweithgareddau antur, sba a phwll nofio dan do
- Maes Carafanio a Gwersylla Parc Gwledig Pen-bre – yn agos at y traeth, gyda gweithgareddau gwych ar y safle
- Gwesty’r Atlantic – lle mae pwll nofio dan do ac ystafelloedd addas i deuluoedd, yn berffaith i grwydro Dinbych-y-pysgod
Mae ein tudalennau am lety sy'n hygyrch i bawb yn y Gorllewin rhoi rhagor o syniadau i chi. Mae gan sawl lle Wi-Fi da dros ben – sy’n ddelfrydol i gyfuno eich gwyliau i’r teulu ac ychydig bach o waith.
Anturiaethau awyr agored: llwybrau gwyllt a gwefr yr arfordir
Does dim ffordd well o fwynhau’r gorllewin na thrwy grwydro yn yr awyr agored. Ymhlith yr uchafbwyntiau mae Llwybr Arfordir Penfro, lle cewch chi fwynhau golygfeydd dramatig dros glogwyni, syfrdanu at y bwâu naturiol a’r creigiau yn y môr, a tharo ar sawl harbwr bach tlws. Beth am daith fach mewn cwch i rai o’r ynysoedd i edmygu’r bywyd gwyllt, fel Ynys Sgomer, sy’n enwog am adar y pâl?
Ewch am dro ar hyd traethau penigamp Gŵyr neu i ddysgu am dreftadaeth ddiwydiannol Castell-nedd Port Talbot. Dilynwch lwybrau hynafol yr Heol Aur ar droed, neu seiclo ffordd Rufeinig Sarn Helen. Yn wir, mae gan Sir Gâr lwybrau seiclo rif y gwlith. Neu ewch ati i drefnu penwythnos iachusol ac ymlacio mewn steil.
Dinbych-y-pysgod, Sir Benfro
Grŵp o ffrindiau yn mwynhau sawna ar draeth Niwgwl, Sir Benfro, Gorllewin Cymru
Solfach, Sir Benfro, Gorllewin Cymru
Parc Gwyliau Tri Chlogwyn, Penrhyn Gŵyr, Gorllewin Cymru
Pâl ar Ynys Sgomer, Sir Benfro, Gorllewin Cymru
Ystagbwll, Sir Benfro, Gorllewin Cymru
Parc Coedwig Afan, Pen-y-bont ar Ogwr, Gorllewin Cymru
Maen Hirion Preseli, Sir Benfro, Gorllewin Cymru
Llyn Brianne a Chaergrawnt, Sir Gaerfyrddin, Gorllewin Cymru
Am ddiwrnod o gyffro a gwefr, rhowch gynnig ar arfordira. Drwy drefnu i fynd gyda darparwr arbenigol, cymwys, fe fyddwch chi’n sicr o gael antur sy’n llawn hwyl ond yn ddiogel hefyd.
Bydd syrffwyr yn heidio i fannau poblogaidd fel traethau Llangynydd a Niwgwl. Mae dyfrffyrdd yr ardal hefyd yn wych i gaiacio a phadlfyrddio, neu trefnwch ddiwrnod i’r brenin yng Nghanolfan Gweithgareddau Llys-y-frân. Fe gewch chi logi offer chwaraeon dŵr neu roi cynnig ar ddringo a thaflu bwyeill.
Ymhlith yr opsiynau llety wrth anturio mae:
- Glampio: Skylark & Hedgerow Hut, gyda thybiau twym, golygfeydd o gefn gwlad, ac awyr dywyll
- Gwersylla: Parc Gwyliau’r Three Cliffs (sy’n croesawu cŵn) uwchben harddwch Bae y Tri Chlogwyn
- Byw mewn fan: Parc Carafanio De Cymru /Fferm Llwynifan, safle i oedolion yn unig, sy’n croesawu cŵn, ac yn hwylus i atyniadau
Dihangfa ddiwylliannol i barau neu ffrindiau
Trefnwch hoe foethus i chi’ch hun yn y gorllewin. Mae yma lwybrau llenyddol i’w dilyn, wedi’u hysbrydoli gan Dylan Thomas a Richard Burton, neu os am wyliau bach rhamantus, beth am ymlacio mewn orielau celf, amgueddfeydd, cestyll a gerddi?
I gael egwyl sy’n cyfuno’r ddinas a glan môr, mae Gwesty Morgans (4*) ger glannau Abertawe yn lle delfrydol. Fe gewch chi wledda mewn steil (Slice, The Shed), mwynhau sioe yn Theatr y Grand Abertawe, a llymeitian coctels yn y marina. Gerllaw, mae traeth Langland yn lle gwych i syrffio, i chwarae golff, ac i fynd am dro ar yr arfordir. Cadwch fwrdd yn y Beach House yn Oxwich – sy’n fwyty seren Michelin – lle cewch chi bryd bythgofiadwy o fwyd.
Ymhlith llefydd moethus i aros mae:
- Grove of Narberth – plasty gwledig sydd â bwyd bendigedig a gerddi o fri. Ewch i grwydro’r siopau annibynnol yn Arberth a mwynhau tro ar hyd glannau afon Cleddau
- Tyddewi – dinas leiaf y Deyrnas Unedig, gyda’r llety braf yn cynnwys Priordy Penrhiw a gwesty Tŵr y Felin
- Y Cawdor yn Llandeilo – gwesty unigryw 4* mewn tref farchnad liwgar, sy’n agos at atyniadau lleol
- St Brides Spa Hotel yn Saundersfoot – lle campus i ymlacio mewn moethusrwydd ar yr arfordir
- Lamphey Court Hotel & Spa – plasty Sioraidd 4* gyda bwydlen dymhorol sy’n defnyddio cynhwysion lleol
