Pethau i’w gwneud yng Nghaerdydd dros y Nadolig

Dewch i Gaerdydd unrhyw dro rhwng 14 Tachwedd - 5 Ionawr 2026 i weld yr addurniadau godidog a’r llwybrau goleuadau o amgylch canol y brifddinas. Mae llwybr Goleuni’r Gaeaf yn llawn goleuadau a gosodiadau sain rhyfeddol, a’r cyfan ar gael i’w fwynhau yn rhad ac am ddim. Codwch fap y llwybr er mwyn mynd i’w gweld nhw i gyd. Mae’r cyfan yma tan ddechrau mis Ionawr.

Dewch i fwynhau asbri’r ŵyl yng Ngŵyl y Gaeaf Caerdydd. Gŵyl yw hon sydd wedi’i lleoli ar lawnt Neuadd y Ddinas ac yng ngerddi Castell Caerdydd. Fe gewch chi sglefrio yn yr awyr agored, mwynhau cyffro’r ffair, a swatio yn y Pentref Alpaidd gyda llymaid i’ch cynhesu a thamaid bach i’w fwyta. Bydd Gŵyl y Gaeaf ar agor o 13 Tachwedd tan 4 Ionawr 2026.

Yn y cyfnod cyn y Nadolig, bydd canol dinas Caerdydd yn gweddnewid wrth i gytiau pren Marchnad Nadolig Caerdydd ymddangos. Mae gan y farchnad dros 200 o stondinau sy’n gwerthu crefftau, anrhegion a bwyd a diod unigryw. Mae yma bopeth o emwaith, serameg, canhwyllau a thecstiliau wedi’u creu â llaw i gaws, mêl, jin a siocled lleol. Bydd y stondinau ar agor bob dydd o 12 Tachwedd tan 23 Rhagfyr 2026, a hynny rhwng 10yb a 6yp dydd Llun - Sadwrn gyda noson hwyr tan 7pm bob nos Iau ym mis Rhagfyr a rhwng 10am a 5pm ar ddydd Sul. 

Yn ogystal â chrwydro’r Farchnad Nadolig, mae Caerdydd ei hun yn lle perffaith i wneud eich siopa Nadolig , boed chi’n chwilio am y brandiau mawr, am siopau bwtîg annibynnol, neu am drysorau o’r oes a fu. Mae popeth yn agos at ei gilydd yng nghanol y ddinas, felly mae’n hwylus iawn mynd o siop i siop yng Nghanolfan Siopa Dewi Sant, ym Marchnad Dan Do Caerdydd, yn yr Aes ac ar Heol y Frenhines. Anelwch am yr arcedau lle cewch chi amrywiaeth hynod o gaffis a siopau annibynnol bach a hudolus. 

Er mwyn camu i ganol byd natur, ewch i Barc Bute. Yn ystod y dydd, crwydrwch drwy’r gerddi prydferth, drwy’r coetiroedd tawel, ac ar hyd glannau’r afon. Liw nos, mwynhewch yr addurniadau a’r goleuadau tymhorol ar hyd y llwybr goleuni anhygoel. Yn wir, gyda cherddoriaeth wych yn gyfeiliant, mae’r Nadolig ym Mharc Bute yn wledd i’r llygad ac i’r glust. Ymunwch ag un o’r teithiau tywys, gweithdai neu weithgareddau i’r teulu sy’n cael eu cynnal rhwng 19 Tachwedd a 31 Rhagfyr 2026.

Dathlwch ysbryd y Nadolig yng Ngŵyl Nadolig Caerdydd, sy’n cael ei chynnal yn stadiwm Gerddi Sophia. Mae’r ŵyl yn cynnwys cerddoriaeth fyw, comedi, theatr a pherfformiadau dawns, yn ogystal ag amrywiaeth o stondinau, faniau bwyd a bariau mewn Spiegeltent wedi’i gynhesu. Mae’r ŵyl fel arfer yn rhedeg o ddiwedd mis Tachwedd i ddiwedd mis Rhagfyr. 

Os wyt ti’n chwilio am dipyn o adloniant a hwyl dros yr ŵyl, mae gan theatrau Caerdydd raglen fywiog o bantomeimiau, sioeau i’r teulu a sioeau cerdd tymhorol.

Mae Canolfan Mileniwm Cymru a’r Theatr Newydd yn cynnal nifer o sioeau Nadolig gwych. Eleni, mae’r arlwy Nadoligaidd yn cynnwys Beauty and the Beast yn y Theatr Newydd, tra bydd Mamma Mia! a Matilda the Musical i’w gweld yng Nghanolfan Mileniwm Cymru.

Yn ogystal â’r holl ddigwyddiadau Nadoligaidd yng nghanol y ddinas, mae rhai o’n ffefrynnau ni o fewn tafliad carreg i Gaerdydd hefyd.

Mae Cadw wrth eu bodd yn cynnal llwybrau a digwyddiadau Nadoligaidd i’r teulu yn ystod mis Rhagfyr, ac mae Siôn Corn a’i gorachod yn sefydlu eu gweithdy hudolus ym Mhrofiad Nadolig y Bathdy Brenhinol yn Llantrisant. Gelli di ymweld â Groto Siôn Corn rhwng 28 Tachwedd a 23 Rhagfyr 2026. Gwna’n siŵr dy fod yn archebu ymlaen llaw, gan fod nifer y tocynnau’n gyfyngedig.

Darllenwch fwy: Digwyddiadau a diwrnodau i’w mwynhau ym mis Rhagfyr ledled Cymru

Os ydych chi’n bwriadu trefnu taith i Gaerdydd dros yr ŵyl, cymerwch gip a gwyliau byr yng Nghaerdydd i gael rhagor o ysbrydoliaeth. Mae ein canllaw gan arbenigwr lleol i lefydd bwyta Caerdydd yn sôn am rai o’r bwytai gorau, ac mae yma ddigonedd o lefydd annibynnol sy’n gwneud bwydydd figan hefyd.