Pan rydyn ni'n cael cyfle i ddangos beth sydd gan Gymru i'w gynnig i fyd y beicwyr, rydyn ni'n creu digwyddiadau sy'n cipio'r dychymyg. Bydd pobl yn siarad am yn hir am y Tour of Britain 2021, pan wnaeth Van Aert wibio heibio Alaphilippe ar gopa'r Gogarth, am fuddugoliaeth Elisa Longo Borghini ar y Mynydd Du yn 2022 a phan enillodd Carlos Rodríguez wrth byrth Castell Caerffili yn 2023.
Bydd Cymru yn cael ei harddangos ar y llwyfan mwyaf un yn 2027 pan fydd y Tour de France yn dod yma - ac rydym yn barod i fanteisio yn llawn ar y cyfle! Rydym yn edrych ymlaen i ddiddanu cynulleidfaoedd ledled y byd, adeiladu ar ein hanes a'n enw da yn rhyngwladol am lwyfannu digwyddiadau chwaraeon, a gosod y seiliau ar gyfer dyfodol disglair yn y byd seiclo yma yng Nghymru.
Mae Cymru'n baradwys i'r beiciwr. Mae ein tirweddau unigryw, ein hamrywiaeth o lwybrau beicio, y cystadlaethau cyffrous, ein diwylliant seiclo bywiog a'r profiadau amrywiol y gallwn eu cynnig, i gyd mor agos i'w gilydd yn ein gwneud yn gyrchfan o'r radd flaenaf i feicwyr.
O wahanol gamau'r Tour of Britain i'r Tour de Môn blynyddol, ac o'r Dragon Ride, un o ddigwyddiadau beicio mwyaf eiconig Prydain, i bencampwriaethau rasio ffyrdd Cymru, mae'r digwyddiadau nodedig hyn yn profi ansawdd yr hyn y gallwn ei gynnig i feicwyr.
Yn ogystal, mae mynyddoedd ac arfordiroedd Cymru wedi bod yn feithrinfa i ddoniau beicwyr sy'n enwog trwy'r byd - arwyr sydd wedi rhagori yn eu meysydd fel Geraint Thomas, Nicole Cooke, Zoe Bäckstedt a Josh Tarling - gan brofi bod Cymru'n fan hyfforddi eithriadol i rai o feicwyr gorau'r byd.