Cwestiynau cyffredin am lwybr dringfeydd y Bwlch, y Rhigos a Mynydd Caerffili
Taith feicio hir a heriol wedi’i hysbrydoli gan lwybr lleol gwych
A hwnnw dros 100km o hyd, ac yn gofyn am dipyn go lew o waith dringo, dyma daith ar gyfer beicwyr ffordd profiadol. Mae’n cyfuno dringfeydd enwog yn y de â rhannau o lwybr Tour de France 2027, ac mae’n reid hir drawiadol iawn o Gaerdydd.
Disgyblaeth: Ffordd
Rhanbarth: Y de-ddwyrain (Caerdydd a’r Cymoedd)
Pellter: 130 km
Faint o ddringo: Llawer
Pa mor anodd: Anodd
I bwy mae’r daith hon? Beicwyr ffordd profiadol sy’n chwilio am daith heriol sy’n para diwrnod llawn, gyda dringfeydd eiconig a thir sy’n gysylltiedig â’r Tour.
Cylchdaith wych drwy gymoedd y de
Gan ddechrau yn Eglwys Gadeiriol Llandaf, dyma daith sydd wrth fodd Peredur ap Gwynedd wrth iddo sôn am dirwedd beicio Cymru – dringfeydd o’r radd flaenaf, ond â chithau byth yn bell o’r ddinas chwaith.
Mae’r daith yn gadael Caerdydd ar hyd Heol Llantrisant, gan gefnu’n raddol ar strydoedd trefol wrth gyrraedd bryniau cefn gwlad. Gan basio drwy Bont-y-clun, Llanharan a Bryncethin, mae’r llwybr yn dringo’n raddol cyn cyrraedd Cwmogwr a’r ddringfa fawr gyntaf: y Bwlch. Mae’r ddringfa eiconig hon yn codi’n gyson ac yn rhoi golygfeydd eang i chi dros y cymoedd.
Wrth ddisgyn i Dreorci, bydd y llwybr yn eich herio eto’n syth bin, a hynny gyda’r daith dros y Rhigos. Dyma ddringfa hirach, fwy agored sy’n ychwanegu at yr ymdeimlad bod pethau’n mynd yn galetach o dipyn i beth. O fan hyn, mae’r llwybr yn mynd drwy Hirwaun ac i lawr at Aberdâr, cyn anelu am y Rhondda Fach lle mae dringfeydd fel rhai Bryn Du a Maerdy yn profi dygnwch rhywun a’i allu i wybod pa mor galed i fynd amdani.
Wrth i’r llwybr ddynesu at Nelson a Chaerffili, byddwch chi’n ymuno â ffyrdd a fydd yn rhan o lwybr Tour de France 2027 – tir reidio a fydd yn cael ei weld yn y pedwar ban. Y prawf olaf fydd dringfa Mynydd Caerffili, cyn gwibio yn ôl i Gaerdydd.
Gan orffen lle dechreuoch chi, mae’r daith hon yn rhoi diwrnod llawn o feicio ffordd clasurol Gymreig i chi. Mae’n cyfuno dringfeydd heriol, tir amrywiol, a chysylltiad cryf â’r diwylliant reidio lleol a dyfodol y gamp yng Nghymru.
Gwybodaeth ddefnyddiol
Lluniaeth:
Mae sawl lle i stopio am damaid i’w fwyta neu lymaid ar hyd y ffordd, gan gynnwys :
- Caffis a siopau ym Mhont-y-clun a Phen-y-bont ar Ogwr
- Tafarndai a chaffis yn Nhreorci, Aberdâr
- Cyfleoedd rheolaidd i gael eich cefn atoch drwy gydol y llwybr
Gwasanaethau:
- Toiledau, llefydd parcio a thrafnidiaeth gyhoeddus yng Nghaerdydd
- Cysylltiadau trafnidiaeth gyhoeddus da ar gael yn nhrefi’r cymoedd, gyda chysylltiadau rheilffordd a bysus yn agos at y llwybr
