Cartref criced yng Nghymru
Parcdir deiliog mawr yng nghanol Caerdydd yw Gerddi Sophia, nid nepell o’r afon. Mae’n lle braf i fynd am dro yn yr haul, ond mae hefyd yn gyrchfan pererindod i gefnogwyr criced yng Nghymru, oherwydd dyma gartref Clwb Criced Morgannwg.
Mae’r arena hon o safon fyd-eang ac mae’n gallu dal bron i 16,000 o wylwyr, felly mae timau sy’n ymweld â Gerddi Sophia yn gwybod o’r gorau am yr awyrgylch trydanol a gaiff ei greu pan fydd y seddi’n llawn a phan fydd cefnogwyr y tîm cartref yn bloeddio’u bonllef.
Mae Gerddi Sophia yn hygyrch i bob ymwelydd, ond byddai’n syniad da ichi gysylltu ymlaen llaw os oes gennych gwestiynau neu anghenion penodol. Mae gan nifer o’r mynedfeydd fynediad gwastad, a cheir mannau gwylio ar gyfer defnyddwyr cadeiriau olwyn a sgwteri symudedd, yn cynnwys llwyfan uwch y gellir ei gyrraedd mewn lifft. Ymhellach, mae’r cyfleusterau arlwyo a’r toiledau yn hygyrch ac estynnir croeso cynnes i gŵn cymorth.
![Stadiwm criced ar lan afon oddi uchod.](/sites/visit/files/styles/o_articleimage_medium__16_9_1x/public/media-library/2022-07/SVW-E41-2223-020_0.jpg?h=42d86326&itok=y8bO9icn)
Gwylio criced yng Nghaerdydd
Criced rhyngwladol
Mae Gerddi Sophia yn cynnal gemau criced rhyngwladol yn rheolaidd. Yn wir, mae yna lu o wahanol fathau o griced i ddewis o’u plith.
Y Cant
Mae’r gêm ‘100 pêl’ newydd yn gyflym ac yn llawn cyffro. Ceir wyth o dimau sy’n cynnwys chwaraewyr rhanbarthol o gyfuniad o wledydd. Fel arfer, caiff gemau’r dynion a’r menywod eu cynnal ar yr un diwrnod, felly cewch gyfle i weld y ddwy. Cynhelir pedair gêm yng Ngerddi Sophia, ac yn ddi-os byddant yn ddiwrnod allan gwych i’r holl deulu, gydag adloniant o fath arall wedi’i drefnu hefyd. Caiff timau’r De Orllewin eu galw’n ‘Dân Cymru’.
![Bowliwr yn dathlu cipio wiced mewn gêm griced.](/sites/visit/files/styles/o_articleimagegroup__landscape__2_1x/public/cdf-070622-ge-glamorgan-v-gloucs-t20-70-18199.jpg?h=20ed2795&itok=9nDMzUsJ)
Criced undydd – y Royal London Cup
Mae gemau cwpan undydd yn cynnwys 50 pelawd, felly maen nhw’n para dipyn yn hirach na gemau’r Cant.
Criced Pencampwriaeth y Siroedd
Os yw’n well gennych fformat traddodiadol y gêm, bydd Morgannwg yn cynnal nifer o gemau cartref. Bydd dwy o gemau pencampwriaeth y siroedd yn cael eu cynnal yma ym mis Medi. Fel arfer, caiff y rhain eu cynnal dros bedwar diwrnod ac mae’n hawdd cael tocynnau ar eu cyfer. Felly, os ydych awydd diwrnod yn yr haul yn gwylio rhywfaint o griced, go brin y cewch eich siomi.
I gael rhagor o wybodaeth ac i brynu tocynnau ar gyfer yr holl gemau, ewch ar wefan Criced Morgannwg.
Darllen mwy: Crwydro Caerdydd mewn 24 awr
Gwylio criced yng Nghastell-nedd
Er bod y mwyafrif o gemau criced proffesiynol Cymru yn cael eu cynnal yng Ngerddi Sophia, caiff ambell gêm ei chwarae mewn mannau eraill. Yn 2022, mae XI cyntaf y dynion yn chwarae dwy o gemau’r Royal London Cup yn y Gnol, Castell-nedd - y tro cyntaf i’r tîm chwarae yma ers 1994.
Ymhellach, mae gan Fae Colwyn, St Helens a Chasnewydd feysydd criced sydd wedi cynnal gemau criced tîm cyntaf yn y gorffennol a’r uchelgais yw cynnal gemau ar rai o’r meysydd hyn drachefn yn y dyfodol.
Ymweld ag Amgueddfa Criced Cymru
Hyd yn oed os na lwyddwch chi i gael tocynnau i weld gêm griced yng Nghymru, gallwch deimlo rhywfaint o’r naws trwy ymweld ag Amgueddfa Criced Cymru CC4. Mae’r amgueddfa hon yn cynnwys casgliad helaeth o eitemau cofiadwy o’r byd criced dros y degawdau – rhai’n dyddio i’r ddeunawfed ganrif.
Tlysau, gwobrau, batiau wedi’u llofnodi, hen ffotograffau, cardiau cadw sgôr a mwy. Yng Ngerddi Sophia y lleolir yr amgueddfa hon hefyd. Bydd ar agor ar ddiwrnodau’r gemau. Gallwch ymweld â’r amgueddfa ar ddiwrnodau eraill hefyd trwy drefnu ymlaen llaw – rhowch wybod iddyn nhw dri diwrnod gwaith ymlaen llaw eich bod yn bwriadu ymweld (museum@glamorgancricket.co.uk). Hefyd, gallwch fynd ar daith o amgylch y stadiwm a defnyddio codau QR i ddarllen paneli gwybodaeth ar eich ffôn.
Darllen mwy: Darganfyddwch ein saith amgueddfa genedlaethol
![Memorabilia criced y tu mewn i gabinet arddangos](/sites/visit/files/styles/o_articleimagegroup__portrait__2_1x/public/Glamorgan%20Cricket%20Club%206.jpg?h=221d5566&itok=5WkS6wDI)
![Ystlum criced y tu mewn i gabinet arddangos.](/sites/visit/files/styles/o_articleimagegroup__portrait__2_1x/public/Glamorgan%20Cricket%20Club%204.jpg?h=993e525d&itok=nIsO6awv)
Gwylio criced ar lefel clybiau yng Nghymru
Caiff criced ar lefel clybiau ei chwarae ar feysydd ledled Cymru. Os hoffech wylio ambell belawd, gan fwynhau peint neu baned o de ar yr un pryd, yna beth am edrych ar wefan play-cricket.com i weld ble yn union y caiff gemau criced o’r fath eu cynnal.