Dewch i weld pa mor gyfforddus ydych chi ag uchder gyda phrofiad dringo gwefreiddiol ar glogwyni’r gorllewin. O ddringo clogwyn garw sy’n ddigon i godi gwallt eich pen, i lefydd dringo dan do ym mhob tywydd, mae opsiynau da i bawb, o’r profiadol a’r hyderus i’r newydd-ddyfodiaid nerfus.
Dechrau arni
Ym Morfa Bay Adventure yn Sir Gâr, fe gewch chi gychwyn ar y dringfeydd bach chwe throedfedd uwch y llawr cyn mentro, yn y pen draw, ar y tŵr abseilio sy’n ymestyn ddeg troedfedd ar hugain i’r awyr. Bydd cyfle wedyn i brofi’ch sgiliau newydd ar greigiau’r môr. Mae ganddyn nhw hefyd lety byncws os byddwch chi awydd aros dros nos.
Gwychder Gŵyr
Dysgwch bopeth am rigio a dechrau mireinio’ch sgiliau yng nghwmni’r arbenigwyr o Gower Adventures, a fydd yn mynd â chi ar daith fertigol ryfeddol drwy ysblander Bae y Tri Chlogwyn.
Mae Rip n Rock yn cynnig cyrsiau dringo ac abseilio byr yng Ngŵyr a chwm Nedd – gyda chyfle i ddringo clogwyni uchel Gŵyr cyn gwibio i lawr eto i gloi’r diwrnod mewn steil.
Yn barod am Sir Benfro?
Parc Cenedlaethol Arfordir Penfro ydy un o lefydd hyfrytaf Prydain (ynghyd â’r unig barc cenedlaethol sy’n gwbl arfordirol). Pa ffordd well o werthfawrogi’r golygfeydd godidog na thrwy hongian oddi ar glogwyn ar gyfres o raffau?
Mae anturiaethau dringo i’w cael ar hyd a lled y fro, diolch i gwmnïau fel Tenby Adventure a TYF Adventure and Coasteering. Mae’r naill a’r llall yn gweithio ledled Sir Benfro ac yn adnabod pob twll a chornel o’r ardal. Byddan nhw’n dewis lleoliad a chwrs sy’n gweddu i amrywiaeth o sgiliau. Yn eu plith mae sesiynau i’r teulu a chyflwyniadau rhwydd, cyrsiau dringo mwy technegol gyda sawl dringen, a chyrsiau sy’n dysgu pobl sut i arwain. Rydych chi’n sicr o gael diwrnod bendigedig a fydd yn aros yn hir yn y cof.
Yng Nghildraeth Llanion, mae modd dringo dan do ar wal bwrpasol lle bydd hyfforddwyr profiadol yn cyflwyno technegau sylfaenol i ddechreuwyr, a’r cyfan mewn awyrgylch cyfeillgar.
