Y Gogarth
Ac yntau dros 200 metr uwch lefel y môr, mae’r Gogarth yn dirnod arfordirol arbennig. Gelwir y penrhyn calchfaen yn Saesneg yn The Great Orme, sy’n golygu bwystfil y môr, ac mae’n safle hynafiaethol sydd wedi ei ddiogelu gyda statws fel gwarchodfa natur. Cerddwch ar daith dywys i’r copa, anelwch at y brig ar y Dramffordd, chwiliwch am anifeiliaid (allwch chi ddim methu’r geifr!) neu ehangwch eich gwybodaeth yn y ganolfan ymwelwyr.
![Golygfa o Landudno o'r Gogarth](/sites/visit/files/styles/o_articleimagegroup__portrait__3_1x/public/media-library/2020-05/WCP_GREAT%20ORME%20RAIL%201-1-small.jpg?h=ae09b1a6&itok=OgoxUDPe)
![Golygfa o Landudno o'r Gogarth](/sites/visit/files/styles/o_articleimagegroup__portrait__3_1x/public/media-library/2020-05/WCP_NW%20COASTAL%20PATH%20ROB%207-small.jpg?h=26d100a0&itok=24XaME5-)
![Golygfa ar hyd Pier Llandudno yn edrych allan i'r môr.](/sites/visit/files/styles/o_articleimagegroup__portrait__3__4_3_1x/public/media-library/2020-05/WCP_DSC09021-small.jpg?h=11a0bde5&itok=fwzOQPjG)
Traeth Pen Morfa
Mae ehangder garw tywodlyd Traeth Pen Morfa yn llawer tawelach na Thraeth y Gogledd yn Llandudno, a gyda hynny daw cyfleoedd gwych i syrffio barcud, padlfyrddio wrth sefyll a phadlo mewn dŵr bas. Mae’n wynebu Bae Conwy ac Eryri ac mae Castell Conwy gerllaw. Dewch â phicnic gyda chi a mwynhewch y llonyddwch.
Oriel MOSTYN
Llethr Sgïo Llandudno
Ar gyfer y rheiny sy’n hoff o gyflymu curiad y galon a’r rhai sy’n ysu i symud, mae llethr sgïo sych Canolfan Chwaraeon Eira Llandudno yn cynnig amrywiaeth o weithgareddau i bwmpio’r adrenalin, gan gynnwys sgïo, eirafyrddio, tobogan a thiwbiau eira.
Ogof yr Eliffant
Mae dros 40 o ogofâu o amgylch Llandudno, nifer ohonynt yn fach neu wedi eu llenwi â dŵr. Yr enwocaf yw Ogof yr Eliffant, i’r gorllewin o Erddi hardd Haulfre. Os ydych chi’n ddringwr profiadol, mae nifer o lwybrau y gallwch eu dringo er mwyn cael blas ar ryfeddodau’r penrhyn.
Camera Obscura
Wedi ei adeiladu ym 1859, mae Camera Obscura Llandudno yn dal i fod yn dipyn o ryfeddod. Fe saif ar frig y Fach ar y Gogarth, man delfrydol sy’n eich galluogi i weld golygfa banoramig 360°. Ar ddiwrnodau clir, gallwch weld yr holl ffordd draw i Fôn ac i Fae Lerpwl.
Castell Conwy
Yn rhan o Safle Treftadaeth y Byd UNESCO, cafodd Castell Conwy ei adeiladu ar gyfer Edward I ar ddiwedd y 13eg ganrif. Tua 700 mlynedd yn ddiweddarach, mae’n dal i ryfeddu. Ewch ar daith dywys er mwyn cael y darlun cyflawn, lle cewch sylwi ar gorneli a chilfachau hawdd eu methu a chlywed chwedlau am hanesion Canoloesol sydd wedi eu cloi rhwng y waliau.
![Llun o Gastell Conwy a'r môr](/sites/visit/files/styles/o_articleimagegroup__portrait__3_1x/public/media-library/2020-05/DR_Visit_Wales_Conwy-0085.jpg?h=14611898&itok=KhV9lDfU)
![Llun o'r awyr o'r bont ger y castell](/sites/visit/files/styles/o_articleimagegroup__portrait__3_1x/public/media-library/2020-05/DR_Visit_Wales_Conwy-0515.jpg?h=4a865c7c&itok=wZnD8dIC)
![Golygfa o'r bont yn edrych tuag at y castell](/sites/visit/files/styles/o_articleimagegroup__portrait__3__4_3_1x/public/media-library/2020-05/DR_Visit_Wales_Conwy-0759.jpg?h=f586c473&itok=YVLZ6Vj0)
Y Sw Fynydd Gymreig
Cewch weld morloi, mwncïod, teigrod, eirth, adar hardd a chreaduriaid egsotig yn y Sw Fynydd Gymreig. Dyma ganolfan gadwraeth ag arddangosfeydd newidiol a rhaglen o ddigwyddiadau gydol y flwyddyn. Byddwch yn ofalus o’r pengwiniaid a’r hebogiaid; pan maen nhw’n dod allan i chwarae, maen nhw’n gallu bod yn gyfeillgar iawn!
Gwarchodfa Natur Bryn Euryn
Dringwch i frig y warchodfa natur hon sy’n sefyll ar fryn o galchfaen er mwyn gweld golygfa banoramig o’r ardal sy’n ei hamgylchynu, gan edrych dros Llandrillo-yn-Rhos. Mae rhwydwaith o lwybrau cerdded ym Mryn Euryn sy'n troelli drwy goetir ac ar draws bryniau gwelltog, gan arwain at olion Llys Euryn – tŷ hanesyddol o’r 15fed ganrif a bryngaer o’r 6ed ganrif
Pier Llandudno
Croeswch ar draws prif draeth Llandudno ac anelu am y pier Fictoraidd clasurol. Yno fe gewch ddewis o nwyddau Cymreig traddodiadol, stondinau Punch a Judy, arcêd ceiniogau a siopau hen ffasiwn. Cafodd y tirnod hwn ei adeiladu’n wreiddiol ym 1876, ac mae’n dal i fod yn lle braf i fwynhau hufen iâ tra’n gwylio’r byd yn mynd heibio ar yr arfordir.
Venue Cymru
O ffilmiau blocbuster a bandiau mawr i theatr gyfoes a chomedi, mae Venue Cymru yn glamp o adeilad modern yn Llandudno. Mae cynyrchiadau mawr sy’n teithio yn tueddu i alw heibio yma, fel ag y mae Opera Cenedlaethol Cymru. Mae golygfeydd dramatig o’r môr hefyd i’w gweld o’r bwyty sydd ar y safle.
Gwarchofda Natur RSPB Conwy
Ble arall allwch chi weld cornchwiglod a chywion gwyddau yn erbyn cefndir o fynyddoedd Eryri a chastell Canoloesol Conwy? Mae RSPB Conwy yn ganolfan gwlyptir 47 erw sy’n gartref i rywogaethau prin o ffawna a phlanhigion, a thirlun gwyllt. Mae toiledau, caffi a siop yn y ganolfan ymwelwyr lle mae hefyd modd llogi sbienddrych.
![Golygfa o Landudno o'r pier](/sites/visit/files/styles/o_articleimage_medium__16_9_1x/public/media-library/2019-06/WCP_DJI_0498-small.jpg?h=9a88627c&itok=UVfO3UMD)