Bwytai ar yr arfordir

Mae bwyty'r cogydd adnabyddus Bryn Williams ar y traeth i bob pwrpas, gyda ffenestri gwydr o’r llawr i’r nenfwd sy’n gwneud yn fawr o olygfeydd panoramig dros Fae Colwyn. Bydd yn rhaid i chi dynnu eich llygad oddi ar y tonnau godidog i lafoerio dros y fwydlen, sy’n rhoi pwyslais ar bopeth lleol, fel pysgod a bwyd môr newydd eu dal, ynghyd â ffrwythau a llysiau a dyfir yng ngardd y gegin. Gellir yfed cwrw o fragdy lleol Pen y Gogarth, ynghyd â dewis o goctels i dynnu dŵr o’r dannedd. Gallwch archebu ‘te prynhawn ar lan y môr’ hefyd. 

Wedi’i anrhydeddu â 3 Roset AA ac enw yn y Canllaw Michelin, mae bwyta yn The Fanny Talbot yn brofiad sy’n cyfuno cainwaith â naturioldeb.

O dan arweiniad y prif gogydd Owen Vaughan, caiff prydau tymhorol sy’n canolbwyntio ar gynhwysion eu creu gyda chreadigrwydd a manylder, tra bo’r awyrgylch yn aros yn groesawgar ac yn hamddenol.

Yma, daw rhagoriaeth heb ffugio na ffwdan — gan eich galluogi i fwynhau bwyd o safon wobrwyedig mewn lleoliad anffurfiol ond cofiadwy yng nghalon Bermo.

Mae Seabreeze yn Aberdyfi yn cynnig gwledd o gynnyrch lleol tymhorol, gyda’u bwydlenni’n newid drwy’r flwyddyn i adlewyrchu’r hyn sydd ar gael ar y pryd.

Mae Proper Gander yn bwyty teuluol yn Nhywyn, lle gallwch fwynhau dysglau Cymreig ffres a bwyd môr mewn awyrgylch hamddenol sy’n croesawu cŵn. Ac mi allwch chi ddim mynd i Aberdyfi neu Dywyn heb gael hufen iâ blasus o'r Pink Cow.

Pe baech chi’n mynd ati i gerdded Llwybr Arfordir Cymru o gwmpas y gogledd, byddech chi’n pasio tair cangen ragorol o fwyty Dylan’s, un ym Mhen Llŷn yng Nghricieth, un ym Môn ym Mhorthaethwy, un ym lleoliad rhagorol yn Llandudno a’r gangen fwyaf diweddar yn Bermo. Mae’r bwydlenni yr un mor addas ar gyfer noswaith ramantus i ddau neu ginio cymdeithasol gyda’r teulu, a gweinir ystod eang o seigiau ‘o’r môr’ ynghyd â phitsa a byrgyrs blasus. 

Peidiwch â cholli: Arbenigedd y lle, cregyn gleision gorau Menai, mor ffres a lleol ag y gallant fod, wedi’u tyfu’n lleol iawn. Gallwch eu bwyta yn arddull Ffrengig ‘Marinière’, neu yn y dull Cymreig, naill ai’n ‘feddw’ (wedi’u coginio mewn seidr) neu ‘ddraig’ (â phuprod coch a garlleg o Gymru).

Mae'r Glengower wedi’i leoli ar bromenâd Aberystwyth. Yn ogystal â bar poblogaidd, maen nhw’n gweini bwydlen flasus wedi’i pharatoi’n ffres saith diwrnod yr wythnos, gan gynnwys cinio Sul traddodiadol.

Mae’r lolfa far yn lle perffaith ar gyfer pob tymor; gyda’i ddodrefn cynnes a chyfforddus, mae’n fan delfrydol i fwynhau diod neu rhywbeth i fwyta. Dros fisoedd yr haf, mae’r Glengower ymhlith y mannau mwyaf poblogaidd yn Aberystwyth gan ei fod yn dal yr haul drwy’r prynhawn a’r noswaith. Y lle perffaith i wylio’r machlud dros y gorwel.

Ychydig fyny'r stryd o'r Royal Pier mae Ultracomida yn far tapas a deli a'i prif ffocws yw ar gawsiau a chigyddiaeth o Sbaen, Ffrainc a Chymru. Os ydech awydd fynd am dro ar hyd y promenâd, mae’r Hut yn lle rhaid galw yn enwog am ei pastries ffres, baninis a’i goffis blasus.

Yn Llanusyllt fe welwch Lan y Môr, bwyty sy’n dod â Hywel Griffith, y dyn y tu ôl i’r Beach House ser Michelin yn y Gŵyr, ynghyd â Gerwyn Jones, cyn Ghef Prifath y Grove o Arberth sy’n ennill gwobrau. Mae Lan y Môr mewn lleoliad arfordirol anhygoel ac yn cynnig bwydlen drawiadol, gyda physgod ffres yn chwarae’r brif ran. Fe’i canmolir yn eang fel un o’r llefydd gorau i fwyta yng Nghymru.

Am bysgod a bwyd môr sydd mor ffres ag y gall fod, ewch i’r Griffin Inn, mewn tafarn hanesyddol ag estyniad modern deniadol, sy’n edrych allan dros harbwr hen-ffasiwn o bert. Mae gan y bwyty nodwedd unigryw, sef ei bysgotwr ei hun, Mark. Bydd yn hwylio yn y ‘Griffin Girl’ bob dydd i ddal popeth o fecryll i leden, a weinir ar y fwydlen gyda thatws newydd Sir Benfro. Mae gan Mark dros 100 o botiau cimychiaid - a’r cwestiwn y bydd angen i chi ei holi fydd: hanner cimwch ynteu un cyfan?

Agorodd y Prif Gogydd Hywel Griffith ddrysau’r The Beach House yn 2016, gan roi bywyd newydd i’r hen gwt glo hwn ar lannau Traeth Oxwich. Ers iddo agor, mae’r bwyty wedi dod yn gyrchfan bwyd da ar y Gŵyr. Mae ei waliau cerrig garw a’i ddodrefn hardd yn adlewyrchu ei leoliad glan mor eiconig gyda thwyni tywod anferth Oxwich, crib Cefn Bryn a Bae Three Cliffs yn y cefndir.

Mae bwyd Hywel yn arddangos blas llawn ein cynnyrch o ledled Cymru yma ar ein stepen drws ym Mhenrhyn Gŵyr. Mae’r bwyty wedi ennill sawl gwobr am ansawdd y bwyd, gan gynnwys 3 Rosette AA, ac mae ganddo Seren Michelin ers 2020.

Mae gan James Sommerin lawer iawn o brofiad, felly rydych chi ar dir diogel wrth i chi eistedd yn hafan Restaurant James Sommerin ar esplanade Penarth. Cychwynnodd y cogydd ar ei yrfa pan oedd ond yn 12 oed, mewn bwyty Eidalaidd yng Nghasnewydd, gan hyfforddi y tu allan i Gymru cyn dychwelyd i’w famwlad hoff gyda’i wraig a’i ferch ifanc (bryd hynny). Bellach mae ei ferch yn hŷn ac yn gweithio yng nghegin ei thad, gan barhau â’r traddodiad o feithrin awch at goginio o’r crud! Mae’r bwyty wedi ennill llu o wobrau a seren Michelin, gan weini bwydlenni blasu chwe chwrs a naw cwrs ar y penwythnos: taith o flasau anhygoel a fydd yn gofyn i chi ailymweld â nhw dro ar ôl tro.