Gwersyll haf a chwmni braf

Mae Urdd Gobaith Cymru yn fudiad gyda bron i 60,000 o aelodau rhwng 8 a 25 mlwydd oed. Ers 1922, mae’r Urdd wedi darparu cyfleoedd i blant a phobl ifanc fwynhau profiadau trwy gyfrwng y Gymraeg. Mae’n fudiad cwbl unigryw sy’n sicrhau cyfleoedd celfyddydol, chwaraeon a chymdeithasol i blant a phobl ifanc Cymru.

Mae drysau pedwar canolfan breswyl yr Urdd ar agor i bawb drwy gydol y flwyddyn. O deuluoedd i griwiau o ffrindiau, i’r rhai sy’n chwilio am brofiadau anturus. Wedi eu lleoli mewn lleoliadau hardd ar draws Cymru, o arfordir Ceredigion i lannau Llyn Tegid a phrofiad canol dinas ym Mae Caerdydd – mae gwyliau gyda’r Urdd wir yn cynnig rhywbeth i bawb.

Rhwng y pedwar gwersyll mae’r Urdd yn denu dros 50,000 o ymwelwyr y flwyddyn ac yn ystod y deunaw mis diwethaf rydym wedi buddsoddi bron i £9.5M yn moderneiddio a datblygu’r Gwersylloedd er mwyn sicrhau ein bod yn cynnig y cyfleusterau gorau i’n gwersyllwyr. Dyma flas ar gynnig pob gwersyll gan gynnwys llety annibynnol newydd yr Urdd, Glan-llyn Isa’.

Agorwyd canolfan breswyl cyntaf yr Urdd, Gwersyll Llangrannog, nôl yn 1932. Mae’r gwersyll yn edrych dros Fae Ceredigion, ger Llwybr yr Arfordir, ac yn cysgu 450. Mae amrywiaeth o gyrsiau ar gael i blant, phobl ifanc a theuluoedd yn ogystal â diwrnodau adeiladu tîm. Yn arbenigo mewn gweithgareddau antur, gallwch fwynhau llwyth o weithgareddau i’r teulu oll: llethr sgïo sych, cwrs antur, beiciau quads, go-karts, llinell sip, marchogaeth, nofio a llawer mwy. Bydd Calon y Gwersyll yn agor yn 2022, sef prosiect sy’n moderneiddio rhannau o’r gwersyll ac yn cynnwys neuadd fwyta a bloc llety newydd fydd yn addas i deuluoedd a grwpiau o ffrindiau.

Mae'r gwersyll wedi'i leoli ger llwybr yr arfordir yn edrych dros Fae Ceredigion ac un o uchafbwyntiau'r gwyliau i lawer yw'r daith gerdded i lawr i'r traeth i wylio'r haul yn machlud a mwynhau hufen iâ!

Wedi ei leoli yng nghanol bwrlwm Bae Caerdydd, o dan do Canolfan Mileniwm Cymru mae Gwersyll Caerdydd. Mae’r gwersyll yn rhoi blas o fywyd dinas i blant, pobl ifanc ac i deuluoedd. Mae’r llety yn cynnig 153 o wlâu a phob ystafell yn en-suite. Mae staff cyfeillgar y gwersyll yn cynnig cymorth i westeion i fynd ar deithiau preswyl a gwneud y mwyaf o’r gweithgareddau a’r atyniadau sydd ar gael ym mhrifddinas Cymru, gan gynnwys ymweld â Stadiwm Principality, taith ar gwch cyflym o amgylch y bae neu docynnau i wylio sioe yng Nghanolfan y Mileniwm.

Yn ddiweddar bu Gwersyll Caerdydd yn gartref i deuluoedd wedi ffoi o Afghanistan.

Darllen mwy: 24 awr yng Nghaerdydd.

Mae Gwersyll Glan-llyn wedi’i leoli ar lan Llyn Tegid ger Y Bala, o fewn ffiniau Parc Cenedlaethol Eryri. Mae’r ganolfan yn arbenigo mewn gweithgareddau awyr agored ac yn cysgu hyd at 245 ar y tro. Ymysg y gweithgareddau i fanteisio arnynt tra’n aros yng Nglan-llyn mae saethyddiaeth, bowlio deg, pwll nofio a chwrs rhaffau uchel. Ar y dŵr beth am fwynhau sesiwn adeiladu rafft, canŵio, hwylio, padl fyrddio neu rwyfo?

Agorwyd gwersyll mwyaf newydd yr Urdd, Glan-llyn Isa’ yn 2021. Gwersyll hunan arlwyo, annibynnol, sydd dafliad carreg o Wersyll Glan-llyn, ond eto yn gwbl ar wahân. Y lleoliad perffaith ar gyfer teuluoedd, criw ffrindiau, grŵp ieuenctid neu i drefnu cwrs, gweithdy neu gynhadledd fach.

Mae’n llety hunangynhaliol sy’n cysgu hyd at 40 (gydag ystafelloedd gyda chyfleusterau anabl). Mae cegin fawr bwrpasol ac adnoddau coginio a chyfarfod tu allan, yn cynnwys popty pitsa, adnoddau barbeciw a chrochan tân, ynghyd â lolfa braf i ymlacio a chymdeithasu. Mae Glan-llyn Isa’ yn cynnig profiadau annibynnol a hyblyg i grwpiau. Gallwch hefyd fanteisio ar yr amrywiaeth o adnoddau awyr agored sydd yng Ngwersyll Glan-llyn, neu ddefnyddio’r ganolfan fel lleoliad i grwydro Eryri.

Dilynwch lwybr cerdded neu feicio i bentref Llanuwchllyn, neu ddringo mynyddoedd Penllyn - Cadair Bronwen, yr Aran a’r Arennig. Mae llwybrau beicio mynydd Coed y Brenin ymysg y gorau ym Mhrydain ac mae’r Ganolfan Dŵr Gwyn Genedlaethol tafliad carreg o’r gwersyll.

Bydd y rhai bach yn mwynhau antur yng ngerddi Caerau, taith trên ar Reilffordd Llyn Tegid yna llond platiad o fwyd a pharc chwarae’r Hwb.

Eisiau rhoi tro ar yr adnoddau barbeciw? Mae TJ Roberts yn gigydd o safon, a beth am alw yn Stori, Y Bala neu Gwin Dylanwad, Dolgellau am botel o win neu gwrw lleol i olchi’r pryd lawr?

Am bryd o fwyd cartrefol ewch i’r Eagles, Llanuwchllyn neu’r Cyfnod yn Y Bala. Eisiau brêc o’r popty pizza? Ewch i Fwyty Mawddach am bizza ffres o’r ffwrn. Am rywbeth ychydig yn fwy crand mae Palé Hall, Llandderfel a Thyddyn Llan, Llandrillo yn wledd a hanner i unrhyw fonheddwr mawr o’r Bala.

Ar ddiwedd diwrnod llawn antur ymgollwch mewn llyfr da o Awen Meirion o flaen tân y lolfa cyn clwydo.

Bydd yr Urdd yn agor gwersyll amgylcheddol cyntaf Cymru ym Mhentre Ifan, Sir Benfro eleni. Bydd Pentre Ifan yn ddihangfa ddigidol ac yn annog pobl ifanc i gysylltu â’u tirlun amgylcheddol a diwylliannol a phrofi ffordd o fyw mwy cynaliadwy. Bydd pobl ifanc yn tyfu ac yn cynhaeafu eu bwyd o’r ardd, ac yn coginio ac yn bwyta gyda’i gilydd o dan y sêr yn y gegin allanol wedi ei bweru gan ynni gwyrdd.

Mi fydd y gwaith adnewyddu gwerth £1.2M yn trawsnewid pum adeilad y safle i wersyll sy’n gyfeillgar i’r amgylchedd ac yn cynnig llety en suite i 55 person yn ogystal ag ystafelloedd amlbwrpas, cegin awyr agored, cyfleusterau arlwyo ac ymolchi sy’n defnyddio pŵer solar, gardd-gegin ac adnoddau glampio. Bydd teuluoedd hefyd yn gallu mwynhau llwyth o weithgareddau awyr agored yn cynnwys mynydda, arfordira, gwyllt grefft a llawer mwy.

Dilynwch Yr Urdd ar Instagram, Facebook a Twitter am y newyddion diweddaraf.