Lleoliadau nofio dŵr agored a gwyllt yng Nghymru

Mae nofio mewn dŵr agored yn brofiad hollol wahanol i nofio mewn pwll nofio sy'n ei wneud yn hyfryd ac yn heriol. Cyn i chi gychwyn, gwnewch yn siŵr eich bod yn barod ar gyfer heriau’r amgylchedd naturiol fel dŵr oer, cerrynt anweledig, a thonnau. Ymunwch â chlwb lleol neu dysgwch gan arbenigwyr cyn mentro - rydym yn argymell defnyddio tywysydd neu nofio dan oruchwyliaeth gyda chlwb mewn dŵr agored. Darllenwch fwy o awgrymiadau ar sut i nofio'n ddiogel a sut i gadw'n ddiogel ar arfordir Cymru.

P'un a ydych chi'n nofiwr gwyllt profiadol, neu eisiau trochi'ch traed am y tro cyntaf. Dyma ein hawgrymiadau ar gyfer lleoliadau gwych i nofio’n wyllt yng Nghymru.

Mae nofio yn Llyn Padarn yn rhoi golygfa unigryw o'r Wyddfa i chi. Mae’r llyn hwn wedi’i ddynodi’n Safle o Ddiddordeb Gwyddonol Arbennig oherwydd ei ddaeareg ynghyd â’r blodyn gwyn tlws - llyriad-y-dŵr arnofiol, a’r torgoch Arctig, pysgodyn prin a ddaeth yn ynysig yn y llyn ar ôl yr Oes Iâ. Mae Llyn Padarn wedi’i ddynodi’n Ddŵr Ymdrochi, sy’n golygu bod ansawdd ei ddŵr yn cael ei fonitro drwy gydol yr haf. Mae’r pontŵn yn Y Glyn, Llanberis yn lle gwych i nofio ohono. Os ydych chi'n newydd i nofio gwyllt neu eisiau awgrymiadau da, cofrestrwch am sesiwn nofio â chymorth gyda Chwaraeon Dŵr Eryri sydd wedi'i leoli gerllaw.

• Achubwyr bywyd neu oruchwyliaeth: Nid oes achubwyr bywyd fel arfer.
• Cyfleusterau: Toiledau, caffis a chyfleusterau i ymwelwyr gerllaw yn Llanberis / Parc Gwledig Padarn.
• Dyfnder y dŵr ac amodau: Llyn dŵr croyw dwfn; gall y dŵr fod yn oer, gyda rhai mannau’n mynd yn sydyn yn ddyfnach.
• Yr amser gorau i nofio: Pan fo’r tywydd yn dawel ac yn sefydlog.
• Poblogrwydd: Poblogaidd, yn enwedig yn ystod yr haf.

Cildraeth tywodlyd perffaith sy'n eiddo i'r Ymddiriedolaeth Genedlaethol. Man perffaith i nofio, cadw llygad am forloi yn torheulo ar y creigiau a gwrando am alwadau mesmerig piod y môr ac adar arfordirol eraill. Nid oes achubwyr bywyd ar y traeth hwn, felly cofiwch gadw o fewn eich galluoedd nofio. Wedi hynny, torrwch syched yn nhafarn enwog Tafarn y Tŷ Coch ar lan y môr.

• Achubwyr bywyd neu oruchwyliaeth: Nid oes achubwyr bywyd fel arfer.
• Cyfleusterau: Tafarn ar y traeth gerllaw; cyfleusterau cyfyngedig.
• Dyfnder y dŵr ac amodau: Bae cysgodol; mae’r dyfnder yn amrywio gyda’r llanw.
• Yr amser gorau i nofio: Mewn amodau tawel, yn ddelfrydol tua’r trai.
• Poblogrwydd: Poblogaidd yn ystod y tymor brig.

Gelwir Porth Oer yn Whistling Sands yn Saesneg oherwydd bod y gronynnau yn gwichian dan draed, sy'n adleisio nodau pibau pan fydd y gwynt yn chwythu i mewn o'r gorllewin. Mae’r llecyn hudolus hwn yn un o gyfres o gildraethau perlog a ffurfiwyd wrth i fynydd arfordirol gogledd-orllewinol y penrhyn ildio i weundir. Mae'n eithaf anghysbell ac nid oes achubwyr bywyd felly cymerwch ofal. Mae yna gaffi bach yr Ymddiriedolaeth Genedlaethol ar y traeth i gael tamaid i'w fwyta neu yfed.

• Achubwyr bywyd neu oruchwyliaeth: Nid oes achubwyr bywyd.
• Cyfleusterau: Caffi tymhorol a thoiledau ger y maes parcio.
• Dyfnder y dŵr ac amodau: Môr agored; gall tonnau a cherrynt fod yn gryf.
• Yr amser gorau i nofio: Dim ond mewn amodau tawel a sefydlog.

Cyfunwch nofio mewn dŵr oer â chymuned fywiog ar Draeth Harlech yng Ngogledd Cymru. Mae’r traeth hardd hwn yn gartref i’r Bluetits Chill Swimmers. Mae ymuno â grŵp ar gyfer nofio mewn dŵr oer yn rhoi hyder a diogelwch ychwanegol, tra’n rhoi’r cyfle i chi rannu manteision adfywiol nofio gwyllt ag eraill. Mae’r nofiwr Olympaidd Jazz Carlin hyd yn oed wedi mentro i’r dŵr gyda’r Bluetits yma, gan amlygu bod y profiad yr un faint am gymuned ag y mae am y dŵr.

Mae’r Bluetits yn gwahodd ymwelwyr i ymuno â nhw yn eu cymuned nofio gymdeithasol ac i nofio yn y môr drwy gydol y flwyddyn. Dysgwch ragor am y Bluetits a’u cyfarfodydd cyfeillgar anffurfiol ar wefan Bluetits Chill Swimmers.

• Achubwyr bywyd neu oruchwyliaeth: Nid oes achubwyr bywyd fel arfer.
• Cyfleusterau: Toiledau ger y traeth / maes parcio; cyfleusterau cyfyngedig ar y traeth ei hun.
• Dyfnder y dŵr ac amodau: Traeth tywodlyd eang; mae’r amodau’n amrywio gyda’r llanw a’r cerryntau.
• Yr amser gorau i nofio: Mewn amodau tawel, yn ddelfrydol tua’r trai.

Mae traeth Bae Caswell yn draeth tywodlyd rhyfeddol, deg munud mewn car o'r Mwmbwls. Yn gyrchfan boblogaidd i ymwelwyr a phobl leol, gall fod yn brysur ar benllanw ond anelwch yno pan fo’r llanw yn y canol neu ar drai ac mae lle i bawb. Mae achubwyr bywyd ar y traeth yn ystod misoedd yr haf, cofiwch gadw o fewn y baneri coch a melyn.

• Achubwyr bywyd neu oruchwyliaeth: Achubwyr bywyd yn bresennol yn dymhorol.
• Cyfleusterau: Caffi, toiledau a chyfleusterau traeth.
• Dyfnder y dŵr ac amodau: Traeth tywodlyd; yn ddibynnol ar y llanw, gyda’r posibilrwydd o gerryntau rhwygo.
• Yr amser gorau i nofio: Pan fo achubwyr bywyd ar ddyletswydd.

Mae dyfroedd bas a bron i dair milltir o dywod euraidd yn golygu mai Traeth y Borth, gyda'i Faner Las a Gwobr Glan Môr, yw un o fannau gorau Ceredigion i fentro i'r dyfroedd. Mae clogwyni Craig yr Wylfa yn cynnig cysgod ym mhen deheuol y traeth o'r gwyntoedd de-orllewinol - mae achubwyr bywyd ar ddyletswydd yn ystod misoedd yr haf felly cadwch lygad am eu baneri. Os ydych chi ffansi nofio gyda chwmni yna ymunwch â'r Aberystwyth Bluetits Chill Swimmers.

• Achubwyr bywyd neu oruchwyliaeth: Achubwyr bywyd yn bresennol yn dymhorol.
• Cyfleusterau: Toiledau, caffis, siopau a pharcio gerllaw.
• Dyfnder y dŵr ac amodau: Dyfroedd bas; yn dibynnu ar y llanw.
• Yr amser gorau i nofio: Yn ystod cyfnodau’r haf pan fo achubwyr bywyd ar ddyletswydd, neu ar adegau o drai tawel.

Ychydig iawn o leoedd sy’n fwy prydferth i nofio na Bae Whitesands, sy'n cael ei ddominyddu gan Garn Llidi creigiog. Beth am oedi i drochi wrth i chi gerdded ar hyd Llwybr Arfordir Sir Benfro, neu dreulio'r diwrnod yn nofio ac yn gwylio'r syrffwyr yn reidio'r tonnau. Mae parcio'n gyfyngedig felly beth am ddal y bws gwennol Y Gwibiwr Celtaidd. Mae achubwyr bywyd ar draeth Whitesands.

• Achubwyr bywyd neu oruchwyliaeth: Achubwyr bywyd yn bresennol yn dymhorol.
• Cyfleusterau: Caffi a thoiledau ger y maes parcio.
• Dyfnder y dŵr ac amodau: Bae tywodlyd agored; mae tonnau ac amodau newidiol yn gyffredin.
• Yr amser gorau i nofio: Pan fo achubwyr bywyd ar ddyletswydd.
• Poblogrwydd: Poblogaidd iawn yn ystod yr haf.

Nid oes achubwyr bywyd ar draeth Bae Tor felly dyma’r lle i’r nofwyr gwyllt mwy profiadol, ond os ydych yn hyderus yn eich gallu ac eisiau dod o hyd i fae hardd, tawelach mae hwn yn berffaith i chi. Ychydig oddi ar y prif lwybr gallwch gerdded o bentref Penmaen a fydd yn cymryd tua 20 munud. Ar ôl nofio ewch am dro i gael golygfeydd anhygoel o Fae'r Tri Chlogwyn a Bae Oxwich.

• Achubwyr bywyd neu oruchwyliaeth: Nid oes achubwyr bywyd.
• Cyfleusterau: Dim prif gyfleusterau traeth.
• Dyfnder y dŵr ac amodau: Gall cerryntau rhwygo fod yn gryf; nid yw’n ddelfrydol ar gyfer nofio hamddenol.
• Yr amser gorau i nofio: O dan oruchwyliaeth.
• Poblogrwydd: Tawelach ac yn fwy diarffordd.

Os ydych yn ‘nofiwr’ yn hytrach na ‘throchwr’ ewch i Lyn Llandegfedd neu Lyn Llys y Fran. Mae'r ddau yn eiddo i Dŵr Cymru ac wedi'u hachredu fel safleoedd S.A.F.E Cymru Nofio Cymru. Os ydych yn nofiwr hyderus gallwch roi cynnig ar y cyrsiau amrywiol sy'n amrywio o tua 100m - 300m, i gyd gyda goruchwyliaeth achubwr bywyd. Byddwch yn dechrau gyda sesiwn cynefino - fel arfer cynhelir y rhain o fis Mai i fis Hydref, ac ar ôl hynny gallwch wisgo'ch gogls a mynd amdani. Gall nofio heb awdurdod mewn cronfeydd dŵr fod yn berygl i fywyd, felly mae’r sesiynau hyn dan oruchwyliaeth yn ffordd berffaith o fwynhau’r dŵr yn ddiogel.

Gall arfordir Cymru fod yn llawer o hwyl ac mae’n cynnig cyfleoedd gwych ar gyfer gweithgareddau anturus, ond darllenwch am y risgiau a gwnewch yn siŵr eich bod yn barod.

• Dilynwch yr awgrymiadau hyn gan yr RNLI ar gyfer cadw'n ddiogel ar arfordir Cymru.
• Ewch i AdventureSmart.uk i gael rhagor o wybodaeth am sut i gadw'n ddiogel wrth grwydro Cymru.