Llefydd picnic penigamp yng Nghymru

Pan ofynnon ni i’n dilynwyr ar Facebook enwi llefydd picnic gwych yng Nghymru, fe gawson ni ymatebion dirifedi. Dyma’r llefydd ddaeth i’r brig. Llenwch eich hamper ac i ffwrdd â chi!

Lle rhamantus ac anghysbell yw Ynys Llanddwyn, sydd wedi’i henwi ar ôl Dwynwen, y dywysoges o’r bumed ganrif a nawddsant cariadon Cymru. Ynys lanw yw hon, sy’n cysylltu â de-orllewin Ynys Môn drwy rimyn bach o dywod. Bydd hwnnw’n diflannu o dan y tonnau pan fydd y llanw’n uchel. Ynghyd â Choedwig Niwbwrch gerllaw, mae Llanddwyn yn Warchodfa Natur Genedlaethol oherwydd ei thwyni a’i chreigiau hynafol.

I gyfuno hwyl picnic hen ffasiwn â rhamant taith ar drên bach, gyda golygfeydd godidog o Eryri i gyd-fynd, Rheilffordd Llyn Padarn amdani. Bydd y locomotifau stêm yn pwffian heibio i Gastell Dolbadarn ac ar hyd glannau Llyn Padarn, cyn stopio yng Nghei Llydan, lle mae traethau braf ar y lan laswelltog.

Mae gan Fryniau Clwyd yn y gogledd-ddwyrain hanes rhyfeddol, ac mae yno lethrau, coedwigoedd a rhostiroedd braf sy’n berffaith ar gyfer cerdded, beicio a marchogaeth.

Mae Coed Moel Famau yn fan cychwyn da i sawl llwybr cerdded o wahanol hyd, gyda rhai’n fwy anodd na’i gilydd. Moel Famau yw’r uchaf o Fryniau Clwyd, felly ar ôl cyrraedd y copa, fe gewch chi fwynhau golygfeydd gwych o’r gogledd a phicnic cwbl haeddiannol!

Mae llwybr cylchol Tŵr y Jiwbilî yn cychwyn o’r maes parcio ac yn dringo’n weddol serth drwy’r goedwig i gopa Moel Famau ac adfeilion Tŵr y Jiwbilî. Mae’r llwybr yn dychwelyd wedyn drwy gefn gwlad agored ar hyd Llwybr Cenedlaethol Clawdd Offa.

Dewch i fwynhau’r golygfeydd braf wrth gael picnic yng Nghastell Llansteffan, a godwyd tua 1280. Yn gefnlen, mae tywod Moryd Tywi, Bae Caerfyrddin, a thir ffermio gwyrdd. Mae croeso i gŵn ar dennyn ar y lefel isaf.

O’r holl lefydd yng Nghymru i chwarae brenin y castell (neu’r frenhines), dyma un da dros ben. Does dim llawer ar ôl o’r gaer o’r drydedd ganrif ar ddeg yn Ninbych-y-pysgod, ond am olygfa! Gorffwyswch ar y penrhyn glaswelltog, teimlwch yr awel ar eich wyneb, a mwynhewch synau glan môr yn codi o’r harbwr tua’r gorllewin ac o’r traeth tua’r de.

Efallai y bydd hi’n dywydd hufen iâ, ac yn ddiwrnod chwilboeth o haf, neu’n brynhawn clir, oer ganol gaeaf. Mae Llandudno, y naill ffordd neu’r llall, wastad yn lle poblogaidd ymhlith y rheini sy’n hoffi mynd am dro, codi cestyll tywod, a bwyta yn yr awyr agored. Ac mae digonedd o gadeiriau plygu i ymlacio ynddyn nhw hefyd.

O faes parcio Pont y Pair ar ochr orllewinol Betws-y-Coed, mae’n waith ychydig funudau o gerdded i ardal bicnic hyfryd yng nghysgod y coed, lle mae’r afon yn llifo’n braf. I fynd ychydig ymhellach, dilynwch y llwybr ar hyd glannau afon Llugwy. Mae rhodfa bren yno, felly bydd defnyddwyr cadair olwyn a theuluoedd sydd â phramiau’n gallu mwynhau’r llecyn tawel hwn.

A hwnnw’n lle tlws i’w ryfeddu, mae traeth Porthdinllaen yn unigryw. Ble arall y gallwch chi ymlacio yn y fath fodd? Anelwch am y Tŷ Coch, hen dafarn y pysgotwyr, cyn rhoi’ch traed yn y tywod gyda pheint braf o gwrw yn eich llaw – a hwnnw wedi’i enwi ar ôl un o frenhinoedd Ynys Enlli. Ar ôl cinio, beth am rywfaint o snorclo, neu wylio gwenoliaid y glennydd yn gwibio oddi fry ac yn plymio i’r ddaear. Chewch chi ddim mynd â cheir yno, ond mae cyrraedd ar droed yn brofiad gwerth chweil.

Felly, dyma chi wedi cyrraedd Bae Rhosili. Dewis da – mae pobl wedi cael eu denu i’r traeth trawiadol hwn yng Ngŵyr ers Oes y Cerrig, sy’n golygu bod yr ardal yn frith o safleoedd archaeolegol. Y cyfan sy’n rhaid i chi ei wneud yw dewis eich llecyn picnic. Mae tair milltir o draeth o’ch blaen. Beth am gystadleuaeth olwyn drol wrth i chi benderfynu?

Os mai lle cysgodol, braf a dyfroedd eang, tawel sy’n mynd â’ch bryd, fe fyddwch chi wrth eich bodd yn Llyn Efyrnwy, cronfa a gafodd ei chreu ar ddiwedd y bedwaredd ganrif ar bymtheg i gyflenwi dŵr i ddinas Lerpwl. Gyda choedwigoedd, dolydd a rhostiroedd o’i amgylch, mae’r lle’n orlawn o fywyd gwyllt, ac yn gartref i wybedogion brith, tingochion, hebogiaid tramor, bwncathod ac ystlumod.