Mentrwch ar hyd lwybrau sgwarnog i’r mynyddoedd ac fe ddewch o hyd i lawer o ffyrdd diddorol o archwilio gogledd Cymru oddi ar y priffyrdd. Ewch igam ogam i greu eich taith ffordd unigryw eich hun.
Ar hyd ffordd arall - yr A5
Mae dilyn yr A5 drwy ogledd Cymru’n creu ffordd arall hyfryd o ddod i’r ardal. Mae’n croesi’r ffin â Lloegr ger Castell y Waun, gan anelu drwy Langollen (dewiswch y ffordd dros Fwlch yr Oernant am olygfeydd ysgubol), ac ymlaen i Eryri. Y darn o’r daith o Gapel Curig i lawr i Ddyffryn Ogwen yw un o ffyrdd mwyaf trawiadol Cymru, gan dorri fel cyllell drwy fynyddoedd y Carneddau a’r Glyderau, sy’n cynnwys crib finiog Tryfan, hoff fynydd y dringwyr gorau i gyd.
Dyffryn Clwyd
Mae pen gogleddol Bryniau Clwyd yn gwlychu’i draed yn y môr ger Prestatyn, ac mae Ardal o Harddwch Naturiol Eithriadol Bryniau Clwyd a Glyndyfrdwy’n ymestyn i’r de at Fynyddoedd y Berwyn. Dyma gadwyn o gopaon grugog â bryngaerau’n eu coroni, ac yma ac acw yn y dyffryn ceir trefi canoloesol hardd fel Rhuddlan, Rhuthun a Dinbych.
![Castell Dinas Brân, Bryniau Clwyd](/sites/visit/files/styles/o_articleimagegroup__portrait__3_1x/public/media-library/2019-01/NVW-C67-1617-0001-small.jpg?h=61734024&itok=8MBdMPLe)
![Golygfa o Gastell Dinas Brân, Bryniau Clwyd](/sites/visit/files/styles/o_articleimagegroup__portrait__3_1x/public/media-library/2019-01/NVW-C67-1617.0011-small.jpg?h=e5aec6c8&itok=ITq-bONt)
![Yr olygfa o Gastell Dinas Brân, Bryniau Clwyd](/sites/visit/files/styles/o_articleimagegroup__portrait__3__4_3_1x/public/media-library/2019-01/NVW-C67-1617-0012-small.jpg?h=768bd092&itok=ewt2GICG)
O gwmpas yr Wyddfa
Gallwch fynd ar daith o gwmpas copaon uchaf Eryri, o Fangor i Gapel Curig, drosodd i Feddgelert, i fyny i Gaernarfon ac yn ôl i Fangor. Dyma sgwâr 50-milltir (80km) a Phas Llanberis yn torri ar ei thraws; yno, maes parcio Pen-y-Pass yw’r lle mwyaf poblogaidd i gychwyn cerdded i gopa’r Wyddfa.
![Golygfa o'r llyn o giât gyda mynyddoedd a choed yn adlewyrchu yn y dŵr.](/sites/visit/files/styles/o_articleimage_small__16_9_1x/public/NVW-C39-1617-0003.jpg?h=1c9b88c9&itok=qrUuJND-)
Afon Menai
Mae dwy bont yn croesi o Fôn; gallwch groesi dros gampwaith gwreiddiol Thomas Telford o 1826, neu dros Bont Britannia fwy modern. Mae’r ail yma’n gynt, ac mae’n cynnig gwell golygfeydd o’r bont arall ac o drobyllau Pwll Ceris islaw. Waeth pa bont ddewiswch chi, mae hi’n werth croesi’r Fenai i weld perlau fel Castell Biwmares, Ynys Llanddwyn, a’r pentref bach â’r enw mawr y mae ei adrodd yn brawf o’ch Cymreictod!
Arfordir Ynys Môn
Mae hi’n rhyw 75 milltir (120km) o daith o gwmpas ein hynys fwyaf ar hyd y priffyrdd – dyna daith ddymunol hanner diwrnod o hyd. Os ydych chi’n dymuno cerdded Llwybr yr Arfordir, mae angen rhyw 12 niwrnod i dramwyo’r 130 milltir (200km) yn llawn. Ymysg yr uchafbwyntiau bydd goleudy Ynys Lawd a chlogwyni a bwâu uwch y môr yn Rhoscolyn, twyni yn Aberffraw, Gwarchodfa Natur Bae Cemlyn, a dwsinau o draethau.
![Goleudy ar glogwyn gyda glaswellt](/sites/visit/files/styles/o_articleimage_fullbleed__thin_1x/public/media-library/2020-05/NVW-D12-2021-0005-small.jpg?h=e5aec6c8&itok=0eCBVx4e)