Llogi e-feiciau a theithiau yng Nghymru

Ar yr olwg gyntaf, gall fod yn anodd gwahaniaethu rhwng e-feic a’i gefnder traddodiadol, ond edrychwch yn fwy gofalus ac mae’r cyfan yn dechrau gwneud synnwyr. Yn cuddio o gwmpas corff y beic mae motorau a batris a gynlluniwyd i roi ychydig mwy o gymorth i reidwyr. Mae’n rhaid i chi weithio’r pedalau o hyd, ond mae cymorth yn ei gwneud yn haws teithio ymhellach a thaclo dringfeydd a fyddai'n rhy anodd pe baech chi’n mynd dan eich pwysau eich hun yn unig.

Unrhyw le ble gallech chi reidio beic arferol. Mae e-feiciau ar gael ymhob siâp a maint, o feiciau oddi-ar-y-ffordd ‘full-suspension’, i feiciau teithio cyfforddus sy’n fwy cartrefol ar ffyrdd llyfn. Efallai yr hoffech fynd ag un i un o’n canolfannau beicio mynydd rhagorol, gan ddefnyddio’r motor ar y llethrau serth er mwyn arbed eich egni ar gyfer taranu i lawr y rhiw.

Neu os ydych chi wedi cael eich ysbrydoli gan berfformiadau Geraint Thomas wrth iddo ennill y Tour de France, ond dyw eich coesau a’ch ysgyfaint ddim cystal, gall e-feic fynd â chi i uchelfannau newydd. Gyda motor i arbed rhywfaint o’r straen, gall beicwyr cymharol ddibrofiad, hyd yn oed, brofi gwefr dringo dros fylchau serth Eryri a Bannau Brycheiniog – cyn mwynhau gwefr yr un mor syfrdanol wrth wibio i lawr ffyrdd mynyddig troellog. Ceir ysbrydoliaeth am anturiaethau beicio yng Ngogledd Cymru gan Snowdonia360.

Mae canolfannau llogi e-feiciau ar gael ledled y wlad, gan gynnig ystod o feiciau a phrofiadau gwahanol. Mae Ebike Hire North Wales, a leolir yn yr Wyddgrug, yn darparu beiciau sy’n ddelfrydol ar gyfer darganfod heolydd a llwybrau’r rhanbarth. Mae’n lle delfrydol i gael tro o gwmpas Bryniau Clwyd a Glyn Dyfrdwy, Ardal o Harddwch Naturiol Eithriadol, yn cynnwys bryniau lliw mwsogl, creigiau calchfaen a rhosydd grugog.

I weld Eryri ar gefn beic, ewch i Beics Betws ym mhrysurdeb canolfan anturio Betws y Coed. Bydd eu dewis nhw o e-feiciau mynydd a llwybr yn tynnu pob ymdrech allan o reidio yn yr ardal fynyddig hon. Gallwch logi trelars beic â tho ar gyfer plant (a chŵn lwcus!) gan sicrhau bod y teulu cyfan yn gallu mwynhau’r hwyl. Os nad ydych chi’n siŵr ble i fynd, gall Beics Betws gynnig dewis enfawr o reidiau tywys – anghofiwch am ddod o hyd i’r llwybr, a chanolbwyntiwch ar fwynhau’r golygfeydd ysblennydd.

Ymhellach i’r de mae cael e-feic gan Pembrokeshire Bike Hire ym Maenorbŷr yn ffordd wych o ddarganfod Parc Cenedlaethol Arfordir Sir Benfro – yr unig barc cenedlaethol cwbl arfordirol yn y DU. Mae taith ar hyd llwybrau tawel, di-drafnidiaeth rhwng Hwlffordd a’r marina prydferth yn Neyland yn ddelfrydol ar gyfer beicwyr o bob gallu, gan gynnig golygfeydd bendigedig o’r môr, ynghyd â digonedd o gaffis a llecynnau picnic ar gyfer cael saib haeddiannol.

Am brofiad mwy anturus, ymunwch ag un o anturiaethau e-feic Wye MTB drwy Ddyffryn Gwy a Bannau Brycheiniog. Byddwch chi’n croesi heolydd tân drwy’r coedwigoedd, yn taclo dringfeydd technegol heriol ac yn wynebu sawl allt serth.