Cynnyrch lleol Y Felinheli a’r fro

Dwi’n teimlo’n ffodus iawn cael byw ar lan y Fenai yn Felinheli. Mae hi’n braf swatio rhwng Bangor a Chaernarfon - dau le mor wahanol, ond y ddau yn cynnig llu o brofiadau bywiog. O fewn cyrraedd hawdd hefyd mae traeth Dinas Dinlle a’i olygfeydd hardd o Lŷn, hen bentref chwarel Bethesda a phentref Llanberis ar lannau Llyn Padarn. Da ni fel teulu yn trio gwneud y mwya’ o’n cyffiniau ac wedi syrthio mewn cariad gyda bywyd a bwyd ein bro. Un o’n hoff bethau ydi cefnogi (a bwyta!) cynnyrch lleol. Dyma rai o’n hoff lefydd sy’n gweini neu’n gwerthu cynnyrch Gwynedd ar ei orau.

Da ni’n ffodus iawn o gael caffi o safon yng nghanol Felinheli. Mae lleoliad Swellies yn ddigon i’ch temtio ynddo’i hun – ar ddiwrnod braf o haf mi fedrwch chi’n hawdd ei gam-gymryd am farina yn Ne Ffrainc. Mae byrddau bach wedi’u gosod ar lan y marina yn cynnig lle perffaith i fwyta bwyd tec-awê wrth wylio’r hwyaid a’r cychod yn mynd a dŵad. Cynnyrch lleol Cymreig wedi ei baratoi’n dda ydi cyfrinach Swellies. Bara ffres lleol, wyau o Ben Llŷn, cig gan y cigydd lleol Tom Hughes, cacennau o Fangor gan Amy’s Kitchen, cwrw o Fragdy Lleu a hyd oed te dail rhydd o Gymru! Dwi’n meddwl bod Ed, y perchennog, wedi laru’n gweld ni erbyn hyn!

Da ni hefyd yn ffodus iawn bod criw mentrus wedi prynu yr hen lofft hwyliau ar y ffrynt a’n gweithio ar ddatblygu bwyty yno. A tra mae’r adeilad yn cael ei drawsnewid mae Llofft Bach - trelar pop up - yn gweini coffi, cacennau a hufen iâ bob dydd Gwener, Sadwrn a Sul. ‘Sa ddim lle gwell i fwynhau panad tra mae’r plant yn chwarae yn y parc, neu wrth eistedd ar y wal yn gwylio’r cychod.

Fferm ffrwythau a llysiau wedi ei lleoli rhwng Bethel a Llanrug ydi Tyddyn Teg. Mae’r troad cul lawr lôn arw yn cynnig cipolwg rhwng y coed a’r dail o’r degau o dwneli polythen. Mae’r holl waith ffermio a chynaeafu yn cael ei wneud gan wirfoddolwyr, a’r holl gynnyrch ar gael i’w prynu mewn siop onestrwydd. Mae’r broses o bwyso a gwneud y symiau yn cystal hwyl â’r casglu!

Mae’n braf gweld hen leoliad y Greek Taverna ym Mangor Uchaf yn cael defnydd eto - ac mae Clena yn sicr wedi cadw naws unigryw'r lle. Mae’r caffi yn gweini dewis da o frecwast gan gynnwys opsiynau figan a brunch tan ganol pnawn. Mae’r fwydlen cinio yn cynnwys prydau llai cyn i’r fwydlen nos newid i wledd Mecsicanaidd gyda tacos, burritos a nachos lu. Mae dewis da o goctels hefyd ac ambell ddigwyddiad cerddorol min nos.

Caffi ar lan y môr Dinas Dinlle yw Braf sy’n gwerthu bwyd tymhorol, cacennau cartref a choffi Poblado. Ond mae Braf yn fwy na chaffi - mae’n ofod cymunedol croesawgar sy’n trefnu llu o ddigwyddiadau a’n croesawu grwpiau i gynnal gweithdai yn eu stiwdio - o ddawns i ioga i sesiynau sensori babi. Mae menter y ddwy ffrind o Ddyffryn Nantlle, Cadi ac Anwen, hefyd yn trefnu clybiau swper yn gweini platiau bach steil Tapas yn defnyddio pysgod lleol a llysiau tymhorol.

Da ni’n mwynhau defnyddio llwybr beics Lôn Las o’r Felinheli i Gaernarfon, rhan o Lwybr yr Arfordir, yn aml. Pan mae digonedd o amser, mae’n braf ei ddefnyddio i nôl neges, neu ymweld â theulu, yn hytrach na neidio i’r car. Yn ddi-ffael, fyddwn ni’n cael ‘pit-stop’ yn Bonta Deli sydd ar Stryd Twll yn y Wal yng Nghaernarfon. Mae’r deli yma fel ogof Aladdin, llawn danteithion hyfryd. Mae’r cynnyrch yn gymysgedd o’r gorau o’r Eidal a Chymru, partneriaeth berffaith yn fy marn i! Mae’r coffi yn anfarwol, ac er mwyn cefnogi busnes lleol… mae’n rhaid cael cacen neu pastry melys yn does?! Mae’r cannoli, y pasta de nata, y gacen gaws, y meringue, y gacen siocled a’r cwcis yn rhai o’n ffefrynnau. 

Fe wnaeth Poblado, sydd yn enw cyfarwydd dros Gymru erbyn hyn, ddechrau cynnig sesiynau ioga a chlwb rhedeg i bobol leol dros y cyfnod clo – ac wrth gwrs, coffi a sgwrs i ddilyn. Ers hynny da ni’n mynd yn gyson, ac mae’n werth i bawb sy’n caru coffi drefnu ymweliad i weld y broses o neud gwahanol ‘blends’, prynu bag o ffa neu gael coffi wedi ei baratoi. Mae’r staff yn barod i adrodd hanes y ffa organig sydd wedi ei brynu’n foesol o Rwanda, Iwganda, Swmatra, Tseinia, Guatemala a Cholombia. Trowch i’r chwith allan o Poblado a fyny am chwarel Nantlle, gyda choffi yn eich llaw – a mi fydd yr holl synhwyrau yn deffro.