Llwybr Coedwig Cymru Trail - Section 1

Gan ddechrau ym Mharc Gwledig Porthceri, mae'r 2 km cyntaf o'r llwybr yn mynd â chi ochr yn ochr â choetiroedd o bwysigrwydd cenedlaethol ac i goetiroedd sy'n arddangos treftadaeth y diwydiant coedwigaeth o'r 19eg ganrif.  Wrth i chi adael y parc, mae'r llwybr yn parhau ar droedffordd i gerddwyr ochr yn ochr â ffin planhigfa Middleton, planhigfa lydanddail gymysg a Choedwig Middleton, rhan o SoDdGA Coedydd y Barri, safle o ddiddordeb gwyddonol arbennig a nodwyd am ei goetir llydanddail lled-naturiol. Yna, mae’r llwybr yn dilyn yr hen ffordd, sy’n adnabyddus yn lleol fel lôn bum milltir, sydd ar agor i gerddwyr a beicwyr. Yna mae'n parhau ar hyd y ffin i Goed Sutton. Arhoswch ar y llwybr hwn am 3km a byddwch yn mynd heibio i fynedfa Fferm Ymddiriedolaeth Amelia, cartref Coed Whitton ac un o safleoedd Coedwig Genedlaethol Cymru.  Fe welwch y coetir i'r gorllewin o'r llwybr trwy'r gwrych. Wrth i’r llwybr barhau tuag at Dresimwn, fe welwch goetiroedd llydanddail i’r dwyrain ac i’r gorllewin o’r llwybr. Wrth i chi fynd i mewn i'r pentref, gallwch gael mynediad i lawer o amwynderau yma, gan gynnwys tafarndai, caffis a siop y pentref. Wrth adael y pentref, mae’r llwybr yn mynd tua’r gogledd tuag at Goedwig Hensol a heibio Fferm Coed Nadolig Ty Cerrig. Wrth i chi fynd heibio Ty Cerrig byddwch yn mynd i mewn i Goedwig Hensol. Mae’r llwybr yn parhau am 3km trwy goetiroedd Coedwig Genedlaethol Cymru, a reolir gan Cyfoeth Naturiol Cymru.