Gweld sêr
Yn 2012 Parc Cenedlaethol Bannau Brycheiniog oedd y Warchodfa Awyr Dywyll Ryngwladol gyntaf yng Nghymru (a’r bumed yn y byd). Oherwydd ei ddiffyg llygredd golau, dyma’r lle perffaith ar gyfer gwylio’r sêr. Ar noson glir, mae’r awyr yn flanced lachar o gyrff nefol, a cheir golygfeydd arbennig o’r Llwybr Llaethog, nifylau pell a sêr gwib. Mae nosweithiau gwylio sêr awyr dywyll yng Nghanolfan Ymwelwyr y Parc Cenedlaethol yn Libanus, felly gwiriwch dudalen digwyddiadau'r Parc Cenedlaethol i gael y manylion diweddaraf.
![Llun o sêr yn y nos uwchben bryniau](/sites/visit/files/styles/o_articleimage_fullbleed__thin_1x/public/media-library/2021-01/MVW-C18-1314-0026.jpg?h=2a71c125&itok=ID_WDtd2)
Chwilio am farcud coch
Roedd yr aderyn eiconig hwn, a enwyd yn Aderyn Swyddogol Cymru yn 2000, ar un adeg yn wynebu difodiant yn yr ardal hon. Diolch i ymdrechion cadwraeth ymroddedig, maent i’w gweld yn gyson bellach yn yr awyr yng Nghanolbarth a De Cymru. Does dim rhaid i chi fod yn adarwyr profiadol i’w hadnabod – cadwch lygad am eu cynffonnau fforchog nodweddiadol.
![Barcud coch yn hedfan](/sites/visit/files/styles/o_articleimage_medium__16_9_1x/public/media-library/2019-02/MVW-C144-1819-0038.jpg?h=da1c1fcc&itok=0UvNnRir)
Ymgolli mewn llyfr da
Mae Gŵyl y Gelli, sy’n ddigwyddiad blynyddol pwysig iawn i’r rhai sydd wrth eu bodd â diwylliant, yn denu awduron, beirdd, gwleidyddion, comedïwyr a phawb arall fwy neu lai i’r Gelli Gandryll am ddeg diwrnod o adloniant sy’n procio’r meddwl. Y Gelli yw’r lle perffaith ar gyfer y wledd o ŵyl ddiddorol hon. Mae’r dref farchnad fach hardd hon yn orlawn o siopau llyfrau, a dyma’r rheswm y caiff ei hadnabod fel prif dref llyfrau ail-law’r byd.
![Llyfrau ar silffoedd](/sites/visit/files/styles/o_articleimagegroup__landscape__2_1x/public/media-library/2020-09/SVW-C08-1718-0038.jpg?h=af64fd07&itok=Hghus1_4)
![Golygfa allanol o flaen y siop lyfrau gydag arwyddion Richard Booth](/sites/visit/files/styles/o_articleimagegroup__landscape__2_1x/public/media-library/2020-06/SVW-C08-1718-0247-small.jpg?h=0c2904f9&itok=2Jog8xiv)
Gemau gwych
Ewch i Lanwrtyd, sydd filltir neu ddwy o ymyl gogleddol Parc Cenedlaethol Bannau Brycheiniog er mwyn cael anturiaethau chwaraeon sydd ychydig yn wahanol. Nid yw hi’n amlwg yn syth, ond mae’r dref fach hon yn ganolfan fyd-eang ar gyfer chwaraeon amgen fel snorclo cors, sgipio cerrig a rasio cerbydau beiciau mynydd. Mae Pencampwriaethau Snorclo Cors y Byd yn eu 34ain flwyddyn ac yn denu cystadleuwyr o wledydd mor bell ag Iran, Corea a’r Unol Daleithiau. Ymhlith y digwyddiadau eraill mae’r Marathon Dyn yn erbyn Ceffyl a’r Real Ale Wobble, sy’n cyfuno beicio oddi ar y ffordd gyda gweini cwrw lleol.
![Dyn yn snorclo trwy gors](/sites/visit/files/styles/o_articleimage_medium__16_9_1x/public/media-library/2021-01/SVW-C24-1617-0121.jpg?h=ad8c8f4d&itok=2ePdu3u2)
Ewch o dan yr wyneb
Ewch o dan y ddaear yng Nghanolfan Ogofâu Arddangos Cenedlaethol Cymru Dan yr Ogof. Profwch fyd tanddaearol o ffurfiadau creigiau anhygoel mewn gofodau llawn atseiniau fel yr Ogof Gadeiriol, a gallwch ddod wyneb yn wyneb â’ch cyndadau yn yr Ogof Esgyrn. Mae hwyl i’w gael hefyd y tu allan i’r ogofâu gan fod yma amrywiaeth o atyniadau fel y parc deinosoriaid (sy’n gartref i dros 200 o greaduriaid cynhanesyddol maint go iawn), canolfan ceffylau gwedd a fferm o’r Oes Efydd.
![Llun o berson tu mewn i ogof](/sites/visit/files/styles/o_articleimagegroup__portrait__3_1x/public/media-library/2021-01/SVW-C95-1819-0087.jpg?h=c3635fa2&itok=-M3f7cE-)
![Dwy bobol yn cerdded trwy ogof gyda goleuadau](/sites/visit/files/styles/o_articleimagegroup__portrait__3_1x/public/media-library/2021-01/SVW-C95-1819-0062-small.jpg?h=3442fd32&itok=oEYS323w)
![Cerflun deinosor yn Dan yr Ogof.](/sites/visit/files/styles/o_articleimagegroup__portrait__3__4_3_1x/public/media-library/2021-01/SVW-C95-1819-0108-small.jpg?h=0ddb5b64&itok=Emasnekl)
Ewch ar daith trên
Mae'r Bannau yn enwog am fryniau a mynyddoedd, a pha ffordd well o gyrraedd yno na ar drên stêm! Mae Rheilffordd Mynydd Brycheiniog yn mynd â chi i ganol Bannau Brycheiniog sy'n rhedeg ochr yn ochr â chronfeydd dŵr Pontsticill a Thaf Fechan cyn dringo i Dorpantau. Mae llwyth o deithiau cerdded y gallwch eu gwneud o amgylch y cronfeydd, neu eisteddwch yn ôl a chymryd y golygfeydd o'r trên.
![Person yn eistedd mewn cerbyd rheilffordd bren agored.](/sites/visit/files/styles/o_articleimagegroup__landscape__1_1x/public/media-library/2021-01/Brecon-Mountain-Railway-3-small.jpg?h=06f6671c&itok=j6JTN5Tg)
Llawn egni?
Beth am fynd i Ganolfan Weithgareddau Llan-gors. Os ydych yn hoffi uchder, ewch i’r afael â’r Sky Trek Experience, cwrs rhwystrau yn yr awyr gyda gwifrau gwib, ysgolion a mannau croesi trwy ganghennau’r coed. Neu ewch ar gefn ceffyl am daith wledig trwy gefn gwlad wyrdd Bannau Brycheiniog. A pheidiwch â phoeni am y tywydd. Gallwch hefyd ddringo, archwilio ogofâu neu abseilio dan do, ac mae yma weithgareddau ar gyfer ymwelwyr iau.
Blas ar wisgi
Distyllfa Penderyn a lansiwyd yn 2004 ar ochr ddeheuol Bannau Brycheiniog oedd y ddistyllfa wisgi newydd gyntaf yng Nghymru ers dros ganrif. Erbyn heddiw, mae’n frand sy’n adnabyddus ar hyd a lled y byd ac mae wedi ennill nifer o wobrau am ei frag sengl enwog. Mae eu canolfan ymwelwyr wedi ennill gwobrau hefyd, ac mae’n rhoi mewnwelediad rhyfeddol i’r broses o wneud wisgi (yn ogystal â chyfle i flasu ychydig o’r cynnyrch).
![Eitemau wedi'u harddangos mewn cypyrddau gwydr a gwaith celf yn yr arddangosfa yn Nistyllfa Penderyn.](/sites/visit/files/styles/o_articleimagegroup__portrait__3_1x/public/SVW-C24-1920-0006-small.jpg?h=72e0457b&itok=UN6ptaSu)
![Pobol yn edrych o gwmpas distyllfa](/sites/visit/files/styles/o_articleimagegroup__portrait__3_1x/public/SVW-C24-1920-0032-small.jpg?h=72e0457b&itok=hoIrMu_E)
![Casgenni wisgi gyda photeli o Wisgi a phaneli gwybodaeth y tu ôl.](/sites/visit/files/styles/o_articleimagegroup__portrait__3__4_3_1x/public/media-library/2020-06/SVW-C24-1920-0010.jpg?h=1c9b88c9&itok=i2vGDzgd)